Miljarder Viktar Kisły pra Kipr: «Ciapier my jak kraina ŭpeŭniena hladzim u budučyniu»

«Ja siabie adčuvaju hramadzianinam śvietu — praktyčna na kožnym kantyniencie ŭ mianie jość ofis, kudy ja mahu zajści, i mnie tam buduć rady», — pryznaŭsia zasnavalnik Wargaming Viktar Kisły ŭ hutarcy z rasijskim časopisam RBK. Užo niekalki hadoŭ uradženiec Minska i vypusknik BDU ź siamjoj žyvie na Kipry. Tam ža z 2011 hoda znachodzicca štab-kvatera Wargaming.

Pavialičyć

Na pačatak 2016 hoda kolkaść supracoŭnikaŭ Wargaming składała 4 tysiačy ŭ 15 ofisach ŭ 10 krainach. U Minsku raźmieščany najbujniejšy ofis kampanii, dzie pracuje kala 2 tysiač čałaviek.

Pośpiech anłajn-hulni World of Tanks prymusiŭ Kisłaha adkryć pradstaŭnictva kampanii pa ŭsim śviecie, i, na jaho dumku, užo takaja vialikaja kolkaść ludziej «robić Wargaming karparacyjaj».

Letaś biznesmen uśviadomiŭ: vialikaja kolkaść ludziej — heta nie tolki zakład pośpiechu, ale prablema. Kampanija raźvivałasia chutka, ale nie zaŭsiody efiektyŭna, pryznaje zasnavalnik Wargaming. Tamu z 2015 hoda kiraŭnictva zaćvierdziła płan restrukturyzacyi. U lutym u kampaniju pryjšoŭ novy kiraŭnik HR-departamienta - Džery Prachazka, eks-dyrektar pa talentach amierykanskaj Riot Games, stvaralnika hulni League of Legends.

Pa miery pašyreńnia hieahrafii mianiaŭsia i skład top-mieniedžmientu. Kali napačatku ŭ kiraŭnictvie byli biełarusy, rasiejcy i ŭkraincy, to ciapier tolki čaćviora kiraŭnikoŭ Wargaming, uklučajučy Kisłaha, havorać pa-rusku. U liku astatnich — amierykancy, brytaniec, hrek-kipryjot, francuz, karejec i fin. Kisły nazyvaje hety kaściak «anałaham savieta dyrektaraŭ». Sam biznesmen užo niekalki hadoŭ nie zajmajecca apieracyjnym kiravańniem, ale nivodnaje stratehičnaje rašeńnie nie prymajecca bieź jaho ŭdziełu.

Zaraz «sumnymi rečami ŭ vyhladzie vypłaty padatkaŭ» zajmajucca vysokaapłatnyja śpiecyjalisty, kaža Kisły. Tak, finansavym dyrektaram kampanii ź biełaruskimi karaniami źjaŭlajecca były apieracyjny dyrektar Barclays Bank Endru Tyńniej.

U lutym Bloomberg uklučyŭ Viktara Kisłaha ŭ lik dalaravych miljarderaŭ. Ahulny košt kampanii Wargaming, pa acency ahienctva, składaje kala 1,5 młrd dalaraŭ. Kisły pra finansavy bok kaža nieachvotna — «nie hatovy raskryvać usie karty pierad kankurentami». Adznačaje tolki, što vyručka kampanii vymiarajecca «sotniami miljonaŭ dalaraŭ». Pa acency Bloomberg, Wargaming pa vyniku 2015 hoda atrymała 590 młn vyručki. Kampanija taksama nie raskryvaje abjom prybytku, ale Kisły śćviardžaje, što vialikaja jaho častka idzie na raźvićcio biźniesu: jon nazyvaje heta «surovym reinvieściravańniem».

U 2013 hodzie Wargaming razam z dvuma bujnymi inviestfondami stała akcyjanieram kiprskaha banka Hellenic. Da hetaha kampaniju Kisłaha vymusili akaličnaści: na Kipry vybuchnuŭ finansavy kryzis, bank zamaroziŭ hrošy ŭkładčykaŭ, siarod jakich akazałasia i hulniavaja kampanija (abjom zavisłych srodkaŭ jana nie raskryvaje). Siońnia biznesoviec nazyvaje nabyćcio Hellenic «dobraj finansavaj inviestycyjaj». Kipr prajaviŭ nadzvyčajnuju dyscyplinavanaść na palityčnaj arenie, praciahvaje jon: usie patrabavańni trojki ES, Jeŭrapiejskaha centrabanka i MVF byli vykanany, i niekalki miesiacaŭ tamu pradstaŭniki hetych arhanizacyj pakinuli vostraŭ. «Ciapier my jak kraina ŭpeŭniena hladzim u budučyniu», — natchniona raspaviadaje Viktar Kisły, pad «my» majučy na ŭvazie kipryjotaŭ.

* * *

Viktar Kisły naradziŭsia ŭ 1976 h. u Minsku. U 1999 h. skončyŭ fizičny fakultet Biełaruskaha dziaržaŭnaha ŭniviersiteta pa śpiecyjalnaści «fizik-łazierščyk». U 1998 hodzie zasnavaŭ kampaniju Wargaming.

Akcyjaniery kampanii — Viktar Kisły (38,5%), jaho baćka Uładzimir Kisły (25,5%), Mikałaj Kacałapaŭ (17%) i Ivan Michnievič (17%). Samaja papularnaja hulnia Wargaming — tankavy simulatar World of Tanks, zapuščanaja ŭ 2010 h. Ciapier u «tančykaŭ» bolš za 100 młn zarehistravanych karystalnikaŭ va ŭsim śviecie. Akramia taho, fanatam marskoha boju dastupnaja World of Warships, a amataram pavietranych batalij — World of Warplanes. U 2013 h. Wargaming nabyła pravy na kultavy brend Master of Orion i ŭ 2015 hodzie anansavała vypusk abnoŭlenaj kaśmičnaj stratehii Master of Orion.

• 0
• 0
• 0
• 0
• 0
• 0
• 0
• 0