U Biełarusi i Rasii siońnia niama nijakich razychodžańniaŭ u dvuchbakovych adnosinach, zajaviŭ ministr zamiežnych spraŭ Biełarusi Uładzimir Makiej 16 maja padčas pieramoŭ z rasijskim kaleham Siarhiejem Łaŭrovym, jaki prybyŭ u Minsk napiaredadni viečaram.
Pavodle słoŭ Makieja, kiraŭniki MZS dźviuch krain sustrakajucca na rehularnaj asnovie, dva razy na hod, dla taho kab abmierkavać pytańni dvuchbakovych adnosinaŭ, udzieł u intehracyjnych abjadnańniach i ŭzajemadziejańnie na mižnarodnaj arenie. «U nas absalutna niama nijakich razychodžańniaŭ. Jość dakładnaje razumieńnie taho, jak nam ruchacca dalej, jakija prablemy vyrašać i ŭ našych dvuchbakovych adnosinach, i ŭ intehracyjnych abjadnańniach», — padkreśliŭ Makiej.
U svaju čarhu Siarhiej Łaŭroŭ adznačyŭ, što plonnyja pieramovy ŭ dvuchbakovym farmacie ź biełaruskim kaleham ŭžo prajšli ŭčora viečaram i siońnia ranicaj. «U nas jość rečy, jakija my pavinny abhavaryć, ale samaje hałoŭnaje — što my nie vykručvajemsia, nie ŭtojvajem čahości ad surazmoŭcy, a vykazvajem svaju zakłapočanaść, svaje prapanovy», — zajaviŭ Łaŭroŭ.
Rasijski ministr vykazaŭ upeŭnienaść u tym, što na siońniašnich pieramovach baki zmohuć pradmietna razhledzieć prahramu ŭzhodnienych dziejańniaŭ Sajuznaj dziaržavy ŭ halinie źniešniaj palityki na 2016—2017 hady, jakaja była zaćvierdžanaja Vyšejšym dziaržsavietam Sajuznaj dziaržavy ŭ pačatku hoda. «U nas jość dakładny płan sumiesnaj pracy, my budziem im kiravacca», — skazaŭ Łaŭroŭ.
Jak paviedamiŭ na minułym tydni pres-sakratar MZS Biełarusi Dźmitryj Mirončyk, paradak dnia pieramoŭ kiraŭnikoŭ źniešniepalityčnych viedamstvaŭ dźviuch krain u Minsku ŭklučaje «šyroki śpiektr aktualnych pytańniaŭ biełaruska-rasijskaha supracoŭnictva i sumiesnaj pracy ŭ miežach roznych intehracyjnych farmataŭ, u pieršuju čarhu JEAES, SND i ADKB».
«Ministry taksama abmiarkujuć temu ŭzajemnaj padtrymki i ŭzhadnieńnia padychodaŭ da dziejnaści na placoŭkach roznych mižnarodnych arhanizacyj, — skazaŭ Mirončyk. — Baki płanujuć abmianiacca dumkami pa najbolš aktualnych prablemach rehijanalnaj i hłabalnaj biaśpieki i stabilnaści». Akramia hetaha, padčas pieramoŭ buduć zakranutyja pytańni raźvićcia dahavorna-pravavoj bazy ŭzajemadziejańnia ministerstvaŭ zamiežnych spraŭ Biełarusi i Rasii.
Paśla pieramoŭ u MZS adbudziecca sustreča Siarhieja Łaŭrova z Alaksandram Łukašenkam. Prahramaj vizitu taksama praduhledžanyja sustrečy kiraŭnika rasijskaha MZS z palitołahami, pradstaŭnikami hramadskich arhanizacyj, vykładčykami i studentami fakulteta mižnarodnych adnosin Biełdziaržuniviersiteta.
Kamientary