U Brusieli pradstaŭniki biełaruskaj apazicyi vystupili z zajavaj adnosna parłamienckich vybaraŭ
Pradstaŭniki biełaruskich demakratyčnych sił vystupili ŭ kamitecie pa mižnarodnych spravach Jeŭraparłamienta z sumiesnaj zajavaj z nahody parłamienckich vybaraŭ, što majuć adbycca. Zajava była zroblenaja padčas vizitu lidaraŭ apazicyi ŭ Brusiel 23—24 maja, paviedamlaje pres-słužba arhkamiteta pa stvareńni partyi «Biełaruskaja chryścijanskaja demakratyja» (BCHD).
Na sustrečy ŭ kamitecie pa mižnarodnych spravach Jeŭraparłamienta ź biełaruskaha boku prysutničali sustaršynia arhkamiteta BCHD Vital Rymašeŭski, namieśnik staršyni ruchu «Za Svabodu» Juraś Hubarevič, staršynia Biełaruskaj partyi levych «Spraviadlivy śviet» Siarhiej Kalakin, adna ź lidaraŭ kampanii «Havary praŭdu» Taćciana Karatkievič, staršynia Abjadnanaj hramadzianskaj partyi Anatol Labiedźka, lidar ruchu «Za dziaržaŭnaść i niezaležnaść» Uładzimir Niaklajeŭ, były palitviazień Mikałaj Statkievič i staršynia Partyi BNF Alaksiej Janukievič.
«Pazicyja demakratyčnych sił Biełarusi była adzinaja: ułady Biełarusi, čarhovym razam falsifikujučy vybary, pryznačać deputatami Pałaty pradstaŭnikoŭ hramadzian, jakich pasprabujuć vydać za pradstaŭnikoŭ apazicyi. Dla nas taki padychod źjaŭlajecca absalutna nieprymalnym, bo jon tolki zakansiervuje situacyju adsutnaści realnych vybaraŭ u Biełarusi», — cytuje Rymašeŭskaha pres-słužba BCHD.
«Takija sustrečy važnyja, tamu što farmujuć kruh siabroŭ Biełarusi, palitykaŭ, jakija padtrymlivajuć demakratyju ŭ našaj krainie. Nam nieabchodna spynić sprobu imitacyi vybaraŭ, sprobu vydać imitacyju za palapšeńnie situacyi», — padkreśliŭ Rymašeŭski.
U paviedamleńni pres-słužby BCHD adznačajecca, što z sumiesnaj zajavaj vystupili ŭsie biełaruskija ŭdzielniki sustrečy, akramia pradstaŭnicy «Havary praŭdu».
Tekst zajavy pakul vyrašana nie publikavać, udakładniŭ pres-sakratar BCHD Maksim Hacak.
Parłamienckija vybary ŭ Biełarusi zapłanavanyja na 11 vieraśnia.
Kamientary