Supracoŭniki Pinskaha HAUS i UBEZ UUS Bresckaha abłvykankama zatrymali žychara Pinska, jaki zajmaŭsia vyrabam i zbytam falšyvych denaminavanych biełaruskich rubloŭ.
U kancy minułaha tydnia pravaachoŭnikam stała viadoma pra niekalki faktaŭ zbytu padroblenych biełaruskich kupiur naminałam 5 i 20 rubloŭ u roznych handlovych punktach Pinska, paviedamlaje MUS.
Padčas apieratyŭna-vyšukovych mierapryjemstvaŭ vyśvietliłasia, što dla zbytu falšyvak złamyśnik vykarystoŭvaŭ niekalki złačynnych schiem. Da zbytu falšyvych 20-rublovak jon padklučyŭ padletkaŭ 10-12 hadoŭ. Maładzion davaŭ im hrošy, na jakija prapanoŭvaŭ kupić čypsy, a reštu viarnuć jamu.
Falšyŭkami mienšaha naminału ŭ asnoŭnym raźličvaŭsia ź piensijanierami, jakija handlujuć na rynku praduktami sa svaich hradaŭ.
Supracoŭniki milicyi zatrymali padazravanaha ŭviečary, 16 žniŭnia, paśla čarhovaj sproby raspłacicca falšyvymi hrašyma ŭ adnym z handlovych abjektaŭ rajcentra.
Jak stała viadoma, 20-hadovy miascovy žychar znachodziŭsia ŭ vyšuku. Niadaŭna jon samavolna pakinuŭ vypraŭlenčuju ŭstanovu adkrytaha typu, dzie adbyvaŭ pakarańnie za kradziež. Pry im znachodzilisia try padroblenyja kupiury pa 5 rubloŭ. Pa miescy pražyvańnia apieratyŭniki kanfiskavali šmatfunkcyjanalnuju strumienievuju pryładu, 3G-madem, aryhinał piacirublovaj kupiury, ź jakoj vyrablalisia falšyvyja, a taksama jašče piać padroblenych banknot uzoru 2000 hoda.
Usiaho ŭstanoŭlena siem faktaŭ zbytu padrobnych hrošaj. Pinski rajonny adździeł USK pa Bresckaj vobłaści zavioŭ kryminalnuju spravu.
Ciapier čytajuć
Adpačynak dla biasstrašnych i biespryncypovych: što ciapier z turami ź Biełarusi ŭ Krym?3
Kamientary