Супрацоўнікі Пінскага ГАУС і УБЭЗ УУС Брэсцкага аблвыканкама затрымалі жыхара Пінска, які займаўся вырабам і збытам фальшывых дэнамінаваных беларускіх рублёў.
У канцы мінулага тыдня праваахоўнікам стала вядома пра некалькі фактаў збыту падробленых беларускіх купюр наміналам 5 і 20 рублёў у розных гандлёвых пунктах Пінска, паведамляе МУС.
Падчас аператыўна-вышуковых мерапрыемстваў высветлілася, што для збыту фальшывак зламыснік выкарыстоўваў некалькі злачынных схем. Да збыту фальшывых 20-рублёвак ён падключыў падлеткаў 10-12 гадоў. Маладзён даваў ім грошы, на якія прапаноўваў купіць чыпсы, а рэшту вярнуць яму.
Фальшыўкамі меншага наміналу ў асноўным разлічваўся з пенсіянерамі, якія гандлююць на рынку прадуктамі са сваіх градаў.
Супрацоўнікі міліцыі затрымалі падазраванага ўвечары, 16 жніўня, пасля чарговай спробы расплаціцца фальшывымі грашыма ў адным з гандлёвых аб'ектаў райцэнтра.
Як стала вядома, 20-гадовы мясцовы жыхар знаходзіўся ў вышуку. Нядаўна ён самавольна пакінуў выпраўленчую ўстанову адкрытага тыпу, дзе адбываў пакаранне за крадзеж. Пры ім знаходзіліся тры падробленыя купюры па 5 рублёў. Па месцы пражывання аператыўнікі канфіскавалі шматфункцыянальную струменевую прыладу, 3G-мадэм, арыгінал пяцірублёвай купюры, з якой вырабляліся фальшывыя, а таксама яшчэ пяць падробленых банкнот узору 2000 года.
Усяго ўстаноўлена сем фактаў збыту падробных грошай. Пінскі раённы аддзел УСК па Брэсцкай вобласці завёў крымінальную справу.
Каментары