Hanna Kanapackaja pakul nie vyznačyłasia z pamočnikami deputata, Alena Anisim — častkova
Demakratyčnyja kandydatki ŭ novym sklikańni Pałaty pradstaŭnikoŭ vyznačajucca z tym, chto budzie ichnimi pamočnikami. Pavodle zakanadaŭstvam dazvalajecca da 5 pamočnikaŭ, adzin ci dva (staŭka ci paŭstaŭki) mohuć atrymlivać zarobak, inšyja ž musiać pracavać na hramadskich pačatkach.
Kiraŭnik AHP, ad jakoj deputatam abranaja Hanna Kanapackaja, Anatol Labiedźka miarkuje, što siarod pamočnikaŭ pavinny być nie tolki siabry AHP, ale i partniory pa pravacentrysckaj kaalicyi, heta značyć ad BCHD i Ruchu «Za Svabodu». «Na staŭcy pavinien być čałaviek, jaki budzie pracavać z vybarcami na akruzie», — pierakanany Labiedźka.
Sam kiraŭnik AHP nie vyklučaje mahčymaści stać pamočnikam deputata Kanapackaj. «Spačatku ja nie razhladaŭ taki varyjant, ale čujecca šmat prapanovaŭ, tamu ja zadumaŭsia. U lubym vypadku ja budu navat kali nie pamočnikam, to daradcam Hanny Kanapackaj u parłamienckaj častcy, nie tak šmat u nas ludziej, jakija majuć deputacki dośvied», — kaža Labiedźka.
Bližej da kanca hetaha tydnia možna budzie bolš detalova i piersanalizavana havaryć pra pamočnikaŭ spadaryni Kanapackaj.
A voś namieśnica staršyni TBM Alena Anisim užo častkova vyznačyłasia sa svaimi pamočnikami. Pakolki Anisim abranaja ad Staŭbcoŭskaj vybarčaj akruhi, to i troje pamočnikaŭ buduć znachodzicca mienavita tam. U Haradziei pamočnikam Anisim stanie Leanid Kačanovič, u Kołasavie — jahony brat Anatol Kačanovič. Ciapier deputatka šukaje pamočnika pa Stoŭbcach.
«Što tyčycca stałaha pamočnika, jaki budzie pracavać na staŭcy, to jašče šukaju. Niechta admaŭlajecca pa siamiejnych abstavinach, inšyja — tolki ŭładkavalisia na novuju pracu», — kaža Alena Anisim. Jana ličyć, što asnoŭnym pamočnikam pavinien być juryst, jaki budzie dapamahać deputatcy z pravavymi pracedurami.
Kamientary