«Nastaŭnica» ź Minska stała zorkaj brytanskich tabłoidaŭ
Daily Mail, The Sun i Mirror nazvali minčanku «samaj seksualnaj nastaŭnicaj matematyki ŭ śviecie».
Brytanskija tabłoidy Daily Mail, The Sun i Mirror uznaharodzili minčanku Aksanu Nieviasiołuju nieaficyjnym tytułam «samaj seksualnaj nastaŭnicy matematyki ŭ śviecie».
Vydańni rastyražavali videa, u jakim, pavodle śćviardžeńnia haziet, biełaruska, apranutaja nie zusim u kłasičny pa mierkach škoły stroj, niešta piša na došcy.
Tabłoidy śćviardžajuć, što videa na Youtube raźmiaściŭ adzin z vučniaŭ Nieviasiołaj, a sama Aksana pradstaŭlaje siabie jak «haračaja nastaŭnica matematyki».
Akramia videarolika brytanskija vydańni apublikavali padborku fatahrafij minčanki z sacyjalnaj sietki Instagram, jakija kudy bolš pikantnyja i bolš adkrytyja za videa. Darečy, u Instagram ŭ Aksany Nieviasiołaj bolš za 170 tysiač padpisčykaŭ.
«Matematyka — składany pradmiet. Ale hetaja nastaŭnica moža zrabić jaje našmat praściejšaj», — piša aŭtar artykułu ŭ Mirror.
Brytanskija ŚMI taksama adznačyli, što ciapier Aksana padarožničaje pa … Małajzii.
Brytancaŭ, mahčyma, Małajzija nie źbiantežyła, a nas — jašče jak. Naŭrad ci školny nastaŭnik, tym bolš u razhar navučalnaha hoda, moža dazvolić sabie takuju pajezdku.
U kamientary z nahody artykułaŭ u brytanskich tabłoidach Naviny.by Aksana Nieviasiołaja admoviła. Darečy, pa našaj infarmacyi dziaŭčyna znachodzicca ŭ Minsku, a zusim nie ŭ Małajzii.
Svaju admovu ad kantaktaŭ jana patłumačyła tym, što «nie choča ŭmiašańnia ŭ svajo pryvatnaje žyćcio».
Pryznacca, padobnaja fraza hučyć jak minimum dziŭna ad čałavieka, jaki pościć u sacsietkach takija fota dla svaich 170 tysiač padpisčykaŭ.
Uličvajučy, što dziaŭčyna admoviłasia paviedamlać pra siabie jakuju-niebudź infarmacyju, karespandent Naviny.by patelefanavaŭ u minskuju himnaziju №42 — heta navučalnaja ŭstanova znachodzicca na staroncy Aksany «Ukantakcie».
U himnazii paviedamili, što vučanica Aksana Nieviasiołaja 1999 hoda naradžeńnia pakinuła ich ŭstanovu «ci to ŭ 10-m, ci to ŭ 11-m kłasie».
— Dziaŭčynka tavaryskaja, vielmi cikavaja, roznabakovaja, abajalnaja. Vydatna adkazvała na ŭrokach litaratury. Ruskuju movu taksama dobra viedała, ale na litaratury prosta bliščeła. Vielmi šmat čytała. Baćki — prafiesijnyja mastaki. Tvorčaja siamja. Aksana — jarkaja błandynka. Udzielničała zvyčajna va ŭsich konkursach i mierapryjemstvach. Siabravała zaŭsiody z usimi, - uspaminaje vykładčyk ruskaj movy i litaratury Volha Dominava.
— Heta značyć, u vas vyklučna stanoŭčaje mierkavańnie pra jaje?
— Nijakaha niehatyvu nikoli naohuł nie było źviazana z Aksanaj, nijakich incydentaŭ. Dobra vučyłasia, dobryja pavodziny.
— Kim Aksana maryła być?
— U takim uzroście mianiajucca pastajanna žadańni. Mahčyma, niešta z humanitarnymi navukami źviazana.
— Kavaleraŭ šmat było ŭ jaje?
— Nijakich kavaleraŭ tady nie było, prynamsi, na terytoryi škoły.
Atestat ab siaredniaj adukacyi Aksana Nieviasiołaja atrymała ŭ siaredniaj škole №67, jakuju skončyła ŭ hetym hodzie. Na jaje staroncy «Ukantakcie» dataj naradžeńnia pakazana 22 vieraśnia.
Heta značyć, jana tolki-tolki adznačyła svajo 17-hodździe. U takim uzroście matematyku kali i vykładajuć, to tolki doma małodšym bratam i siostram…
Kamientary