Rasijskaja prapahanda praciahvaje vajavać z vydumanymi saboj lićvinami
U Biełarusi isnuje asobnaja nacyja «lićvinaŭ», ahresiŭnaja mienšaść, jakaja choča padparadkavać «biełaruskuju bolšaść», piša prapahandyscki rasijski resurs.
Tezis pra «nacyjanalna raskołatuju» Biełaruś dazvalaje prapahandystu kazać pra isnavańnie pieradumoŭ dla «ŭkrainskaha scenara» u Biełarusi, bo «adzinaja nadzieja biełarusaŭ — heta dapamoha z bratniaj Vialikarosii».
U rasijskaj prapahandzie tezis pra nacyjanalny padzieł Biełarusi — nie novy.
Jašče ŭ siaredzinie 1990-ch hadoŭ jaho ahučvaŭ Alaksandr Fadziejeŭ, jaki dahetul uznačalvaje siektar Biełarusi ŭ blizkim da śpiecsłužbaŭ «Instytucie krain SND» pad kiraŭnictvam Kanstancina Zatulina.
U toj čas, čas bujnych vuličnych demanstracyj suprać abjadnańnia Biełarusi z Rasijaj, ideja pra isnavańnie «inšaj nacyi» ŭ Biełarusi spatrebiłasia dla taho, kab rastłumačyć rasijskamu nasielnictvu, adkul u Biełarusi masavy supraciŭ idejam «słavianskaj intehracyi bratnich narodaŭ».
Novaja hienieracyja impiercaŭ admaŭlaje samo isnavańnie biełaruskaha naroda navat jak bratniaha — u ich prapahandzie jość albo biełarusy jak rehijanalnaja častka rasijskaha narodu, pryčym vyklučna rasijskamoŭnyja, albo «judy», jakija «namahajucca razmaŭlać na movie».
Pry hetym manipulujuć staražytnym słovam «ruski», jakomu zamiest jaho sapraŭdnaha sensu prypisvajecca sens «maskoŭski».
«Ruśsiu» ŭ kancy I tysiačahodździa n.e. nazyvali skandynaŭskich kniazioŭ i ich družyny, jakija stvaryli svaje kniastvy na terytoryjach sa słavianskim i častkova bałckim i fina-vuhorskim nasielnictvam.
Sapraŭdny «Ruski śviet» spyniŭ isnavańnie z manholskim našeściem, a kali jaho peŭnyja rysy i praciahvali isnavać, to ŭ miežach Vialikaha Kniastva Litoŭskaha i Rečy Paspalitaj, a taksama takich haradoŭ-dziaržaŭ, jak Noŭharad i Pskoŭ.
Mienavita tut isnavała i zachavałasia mocnaje haradskoje samakiravańnie i mahutnaja rycarska-družynnaja elita, jakaja časam mahła dyktavać svaju volu siuzierenu. Tut zachavalisia i charakternyja dla damanholskaj Rusi ščylnyja kulturnyja, dypłamatyčnyja i dynastyčnyja suviazi z Zachadam.
Sučasnaja rasijskaja prapahanda maluje biełaruskamoŭnych biełarusaŭ vorahami «sapraŭdnych biełarusaŭ».
«Ukrainski scenar» raskručvali padobnym ža čynam — raspalvajučy varožaść pamiž «sapraŭdnymi ŭkraincami» i «haličanami», jakija byccam by pačali kulturna i palityčna pryhniatać «ukrainskuju bolšaść».
Šavinistyčnaja prapahanda nie pieršy raz imkniecca vykarystać falšyvuju ideju isnavańnia niejkaj asobnaj «lićvinskaj» nacyi ŭ Biełarusi. Adnak tezis hety, zdajecca, zanadta składany, kab mieć pośpiech.
Na pierapisie 2009 hoda ŭ Biełarusi lićvinami zapisalisia ŭsiaho 66 čałaviek, ź ich 43 — u Minsku. Adzin ź ideołahaŭ «lićvinaŭ», Alaksiej Dziermant, z taho času pierajšoŭ na prarasijskija pazicyi.
Kamientary