U sacyjalnaj sietcy Facebook źjaviŭsia tekstavy pošuk pa vyjavach, jaki realizavany z dapamohaj technałohij hłybokaha mašynnaha navučańnia. Pra heta paviedamlaje nplus1 sa spasyłkaj na TechCrunch.
Dziakujučy pošuku vyjaŭ pa tekstavym apisańni karystalniki mohuć znachodzić patrebnyja karcinki siarod vialikich masivaŭ vyjaŭ. Takimi mahčymaściami, naprykład, vałodajuć niekatoryja internet-pošukaviki, u tym liku Google i Jandeks, taksama intelektualny pošuk vyjaŭ jość u servisie Pinterest. Pakolki karystalniki sacyjalnych sietak časta zahružajuć vialikuju kolkaść fatahrafij, pošuk pa ich z dapamohaj tekstavaha apisańnia moža być zručnym instrumientam.
Technałohija pošuku vyjaŭ «pavodle sensu» ŭ Facebook atrymała nazvu Lumos. Raniej funkcyja była ekśpierymientalnaj i pazicyjanavałasia jak dapamožny instrumient dla ślapych i sa słabym zrokam, adnak ciapier Lumos staŭ dastupny i inšym karystalnikam. Na dadzieny momant servis pracuje tolki na anhlijskaj movie i dastupny karystalnikam u ZŠA, ab zapusku ŭ inšych krainach pakul ničoha nie paviedamlajecca.
Servis Lumos stvorany na asnovie płatformy mašynnaha navučańnia FBLearner Flow, i dla navučańnia niejrasietki byli vykarystanyja «dziasiatki miljonaŭ» fatahrafij, adznačajuć pradstaŭniki TechCrunch. Pošuk pa vyjavach pracuje jak u mabilnaj prahramie, tak i ŭ brauziernoj viersii sacyjalnaj sietki, pryčym Lumos sočyć za tym, kab u vydačy nie było amal adnolkavych fatahrafij. U budučyni raspracoŭščyki płanujuć dadać anałahičnuju funkcyju pošuku pa videazapisach.
Kamientary