Złučanyja Štaty paćvierdzili, što buduć vykonvać pahadnieńnie ab pierasialeńni mihrantaŭ, zaklučanaje z Aŭstralijaj. Pra heta zajaviŭ vice-prezident ZŠA Majkł Piens ŭ Sidnei na na sumiesnaj pres-kanfierencyi z premjer-ministram Aŭstralii Małkalmam Ternbułam, paviedamlaje VVS.
Pa słovach Piensa, zachavańnie dasiahnutych damoŭlenaściaŭ nie aznačaje, što Vašynhton «zachaplajecca» imi.
«My budziem vykonvać hetaje pahadnieńnie z pavahi da našaha nadzvyčaj važnaha sajuźnika», — rastłumačyŭ jon, majučy na ŭvazie Aŭstraliju.
U lutym prezident ZŠA Donald Tramp nazvaŭ damovu, zaklučanuju pry jaho papiaredniku Baraku Abamie, «durnoj uhodaj».
«Vy možacie ŭ heta pavieryć? Administracyja Abamy pahadziłasia pryniać tysiačy nielehalnych mihrantaŭ z Aŭstralii. Navošta? Ja budu raźbiracca z hetaj durnoj uhodaj!» — pisaŭ jon u tvitary.
U listapadzie minułaha hoda ZŠA i Aŭstralija damovilisia ab pierasialeńni ŭ Złučanyja Štaty biežancaŭ ź mihracyjnych centraŭ, stvoranych Aŭstralijaj u Papua-Novaj Hviniei i Nauru.
Zhodna z damoŭlenaściami, ZŠA pavinny byli pryniać 1250 biežancaŭ, jakija prosiać prytułku. U svaju čarhu Aŭstralija budzie pierasialać biežancaŭ z Salvadora, Hvatemały i Handurasa.
Amierykanskija ŚMI paviedamlali, što padčas pieršaj telefonnaj razmovy z aŭstralijskim premjeram Ternbułam amierykanski prezident vykazaŭ niezadavolenaść uhodaj pa biežancach i nibyta kinuŭ słuchaŭku praz 25 chvilin paśla pačatku razmovy.
Hazieta Washington Post pisała, nibyta Tramp nazvaŭ razmovu z Ternbułam najhoršaj za ŭvieś dzień pieramoŭ, u jaki jon paśpieŭ patelefanavać jašče niekalkim suśvietnym lidaram.
Sam Tramp acharaktaryzavaŭ hutarku z premjeram Aŭstralii jak «vielmi mirnuju razmovu» i abvinavaciŭ «fejkavyja ŚMI» ŭ chłuśni.
Ternbuł nazvaŭ ich razmovu z prezidentam ZŠA «ščyraj i adkrytaj».
Pahadziŭšysia vykanać pahadnieńnie pa biežancach z aŭstralijskich mihracyjnych centraŭ, Bieły dom papiaredziŭ, što ŭsie suiskalniki prytułku buduć padvierhnutyja dbajnaj praviercy.
Uhoda, jak piša ahienctva Rejter, ciapier nabyła asablivaje značeńnie dla Aŭstralii, jakaja adčuvaje cisk z boku AAN i pravaabarončych arhanizacyj, jakija patrabujuć zakryć mihracyjnyja centry. U pieršuju čarhu heta tyčycca vyspy Manus u Papua-Novaj Hviniei, dzie adbylisia sutyčki pamiž miascovymi žycharami i žycharami łahieraŭ dla biežancaŭ.
Kamientary