BSB Bank apublikavaŭ na sajcie rekamiendacyi dla klijentaŭ, jakija na dadzieny momant znachodziacca za miažoj i nie zmohuć viarnucca ŭ Biełaruś da 26 červienia.
«Klijenty, jakija znachodziacca za miažoj, mohuć paprasić svaich svajakoŭ abo davieranych asob atrymać biaspłatna niepiersanifikavanyja apłatnyja kartki ŭ BSB Banku. Na takuju kartu možna pieravieści hrašovyja srodki z kartki, jakaja znachodzicca z klijentam banka za miažoj. Akramia taho, svajaki, davieranyja asoby zmohuć biez kamisii źniać hrošy z atrymanych kartak u bankamatach i adździaleńniach BSB Banka ŭ Biełarusi», — havorycca ŭ paviedamleńni banka.
Dla atrymańnia niepiersanifikavanaj kartki nieabchodna źviarnucca ŭ adździaleńnie BSB Banka. Pry sabie nieabchodna mieć pašpart. U banku padkreślivajuć, što karty jość u najaŭnaści i vydajucca biaspłatna.
Jak paviedamlałasia, Nacyjanalny bank Biełarusi adklikaje z 26 červienia licenziju ZAT «BSB Bank» ŭ častcy asobnych bankaŭskich apieracyj ź fizičnymi asobami. Takoje rašeńnie pryniataje z ulikam vyjaŭlenych u chodzie pravierki banka parušeńniaŭ i niedachopaŭ u jaho dziejnaści. Rašeńnie ŭstupaje ŭ siłu z momantu paviedamleńnia banka ab jaho pryniaćci, jakoje pryznačanaje na 26 červienia. BSB Bank praciahvaje ŭ poŭnym abjomie pracavać ź jurydyčnymi asobami i indyvidualnymi pradprymalnikami.
BSB Bank źviarnuŭsia z prośbaj da klijentaŭ źniać hrašovyja srodki z usich svaich płaciežnych kartak banka, a taksama z rachunkaŭ fizičnych asob da 25 červienia 2017 hoda. Paśla hetaj daty fizičnyja asoby zmohuć atrymać svaje srodki va ŭpaŭnavažanym banku. Źniać hrošy z rachunkaŭ možna budzie ŭ kasach BSB Banka, a taksama ŭ bankamatach luboha banka — na biahučy momant admienienyja ŭsie kamisii za źniaćcie hrašovych srodkaŭ na terytoryi Biełarusi. U toj ža čas šerah biełaruskich bankaŭ — Bielinviestbank, Biełahraprambank, BPS-Śbierbank i Pryjorbank — zabłakavali kartki BSB Banka. U suviazi z hetym bank rekamienduje klijentam zdymać srodki ŭ bankamatach BSB Banka, infarmacyja ab dastupnaści hrašovych srodkaŭ u jakich budzie apieratyŭna raźmiaščacca na sajcie bankaŭskaj ustanovy.
Kamientary