Hałoŭnym inžynieram budučaj biełaruskaj AES staŭ rasijski specyjalist
Pra heta paviedamiŭ 19 žniŭnia na pres-kanfierencyi ŭ Minsku inžynier dyrekcyi budaŭnictva AES Uładzimir Pietruškievič.
Pavodle jaho słoŭ, u dyrekcyi novy śpiecyjalist pracuje z 18 žniŭnia. «Jahony staž pracy na atamnych stancyjach Rasii — pryblizna 25 hadoŭ, jon prajšoŭ usie pasady pačynajučy ad apieratara», — padkreśliŭ U. Pietruškievič. Pradstaŭnik dyrekcyi nie staŭ nazyvać proźvišča i miesca papiaredniaj pracy hałoŭnaha inžyniera budučaj AES, adznačyŭšy tolki, što ŭ najbližejšy čas jon budzie pradstaŭleny žurnalistam.
Pavodle słoŭ Pietruškieviča, na adkaznyja pasady pieršaha błoka biełaruskaj AES płanujecca zaprasić 70—80 śpiecyjalistaŭ z-za miažy. «Da nas źviartajucca šmat śpiecyjalistaŭ. Dla zabieśpiačeńnia funkcyjanavańnia AES hrafik zaprašeńnia ludziej budzie ažyćciaŭlacca z apieradžeńniem budaŭnictva. Ciapier ź imi iduć pieramovy», — skazaŭ pradstaŭnik dyrekcyi.
Zhodna z patrabavańniami narmatyŭnych dakumientaŭ, zaznačyŭ Pietruškievič, da 2014 hoda, nie paźniej jak za dva hady da ŭvodu stancyi ŭ ekspłuatacyju (pieršy błok płanujecca ŭvieści ŭ 2016 hodzie), pavinien być nabrany ŭvieś piersanał AES. "Isnuje hrafik apieradžalnaha naboru, dzie pa hadach, pa roznych etapach budaŭnictva vyznačana, jakija śpiecyjalisty patrebny dla budučaj AES», — skazaŭ inžynier dyrekcyi.
U. Pietruškievič paviedamiŭ, što dla ŭvodu pieršaha błoka nieabchodna nabrać 1,2 tys. čałaviek, a ŭsiaho na dvuch błokach biełaruskaj AES buduć pracavać pryblizna 2 tys. śpiecyjalistaŭ.
Tym časam načalnik upraŭleńnia vyšejšaj i siaredniaj śpiecyjalnaj adukacyi Ministerstva adukacyi Biełarusi Juryj Miksiuk paviedamiŭ, što z novaha navučalnaha hoda kala 200 studentaŭ pačnuć navučańnie ŭ halinie jadziernaj enierhietyki.
Pavodle jaho słoŭ, z hetaj metaj u biełaruskich VNU adkryty novyja śpiecyjalnaści i śpiecyjalizacyi.
Kamientary