U Tadžykistanie abrali žonku nastaŭniku i zładzili viasielle pa daručeńni prezidenta
U niadzielu, 27 žniŭnia, u adnym z restaranaŭ Kurhan-Ciubie adśviatkavali viasielle Mardžona i Saidša, što žyvuć u Bachtarskim rajonie, paviedamlaje «Radio Ozodi».
Za hetym viasiellem i padrychtoŭkaj da jaho nazirali i žurnalisty, i čynoŭniki, i prostyja žychary, bo jano adbyłosia pa daručeńni prezidenta krainy.
Jašče miesiac tamu Mardžona i Saidša — maładaja miedsiastra i sielski nastaŭnik historyi — ujavić nie mahli, što chutka abmianiajucca zaručalnymi piarścionkami. Bolš za toje, jany, možna skazać, i paznajomilisia na svaim viasielli.
A ŭsio pačałosia z taho, što 16 žniŭnia prezident krainy Emamali Rachmon padčas svajoj rabočaj pajezdki pa Chatłonskoj vobłaści zajechaŭ u kišłak Zarhar Bachtarskaha rajona. U čas sustrečy z aktyvistami da mikrafonu padyšoŭ 23-hadovy nastaŭnik historyi siaredniaj škoły №39 Bachtarskaha rajona Saidša Asroraŭ. Jon skazaŭ, što ščaślivy ŭbačyć na svaje vočy kiraŭnika dziaržavy, padziakavaŭ jamu za starańni ŭ śfiery adukacyi i vychavańni maładoha pakaleńnia, i navat pračytaŭ paetyčnyja radki ŭ honar lidara.
Emamali Rachmon pacikaviŭsia, ci žanaty Saidša. Paśla sustrečy ŭłady Bachtarskaha rajona atrymali daručeńnie znajści spadarožnicu žyćcia dla nastaŭnika historyi i dapamahčy jamu ŭ arhanizacyi viasiella.
Paśla taho, jak miascovyja ŭłady ŭzialisia vykonvać daručeńnie prezidenta i stali dumać, kaho ž vydać za Saidša, małady čałaviek zajaviŭ, što choča ruki i serca Mardžony — dački jaho kalehi, nastaŭnika fizkultury. Chłopiec skazaŭ, što bačyŭ dziaŭčynu tolki adnojčy, kali jana vučyłasia ŭ miedycynskim kaledžy Kurhan-Ciubie. Mardžona jamu šalona spadabałasia.
Kamientary