U Biełarusi prykmietna vyrasła kolkaść tych, chto atrymlivaje minimalnuju pracoŭnuju piensiju. Za apošnija 6 hadoŭ ich kolkaść pavialičyłasia amal u 5 razoŭ, piša Tut.by z spasyłkaj na časopis Minfina «Finansy, ulik, aŭdyt». Pry hetym u Biełarusi raście taksama i kolkaść atrymalnikaŭ sacyjalnych piensij.
«Źviartaje na siabie ŭvahu rezki rost u apošnija hady kolkaści hramadzian piensijonnaha ŭzrostu, jakija atrymlivajuć pracoŭnuju piensiju ŭ minimalnym pamiery (u červieni jana składała 224 rubli, abo kala 70% ad siaredniaj piensii pa ŭzroście)», — adznačaje vydańnie.
Kali ŭ 2010 hodzie ich było 42 tysiač čałaviek, to ŭ 2016-m - 200 tysiač, abo kala 10% ad usich piensijanieraŭ pa ŭzroście. Dadzieny pakazčyk amal supastaŭny z uzroŭniem 2000 hoda, kali takich asobaŭ było kala 260 tysiač (13%). Ale da 2010 hoda ich kolkaść źniziłasia ŭ šeść razoŭ.
«Siońnia na pamier piensii pa ŭzroście akazvajuć upłyŭ dva faktary — praciahłaść pracoŭnaha stažu i pamier dachodu hramadzianina, ź jakoha vypłačvajucca ŭnioski ŭ FSAN. Pry hetym asobnyja subjekty haspadarańnia ŭ metach minimizacyi svaich vydatkaŭ praktykujuć vypłatu uznosaŭ, zychodziačy ź minimalnaha zarobku, — piša vydańnie.
U pryvatnaści, pavodle acenak Minpracy i sacabarony, heta datyčyć kala 95% usich indyvidualnych pradprymalnikaŭ. A tamu takim katehoryjam varta raźličvać tolki na minimalnuju piensiju, padkreślivajuć śpiecyjalisty»
Najbolš vysokaapłatnymi ŭ Biełarusi źjaŭlajucca piensijaniery, jakija majuć asablivyja zasłuhi pierad dziaržavaj. U 2016 hodzie im u siarednim płacili kala 460 rubloŭ u miesiac, što ŭ paŭtara raza vyšej siaredniaj piensii pa ŭzroście. Na pačatak hoda naličvałasia 4,9 tys. takich hramadzian, i ich kolkaść na praciahu apošnich hadoŭ zastajecca adnosna stabilnym.
Kamientary