Piać faktaŭ pra vice-premjera pa sielskaj haspadarcy Uładzimira Dvornika
55-hadovy kiraŭnik Homielskaj vobłaści Uładzimir Dvornik 4 krasavika pryznačany vice-premjeram pa sielskaj haspadarcy. Na hetaj pasadzie jon źmianiŭ Michaiła Rusaha, jaki adpraŭleny padymać Mahiloŭskuju vobłaść. Pra asobu Uładzimira Dvornika nie tak šmat usiaho viadoma, «Naša Niva» pasprabuje zakryć prabieły ŭ bijahrafii čynoŭnika.
Maci vyhadavała adna
Uładzimir Dvornik naradziŭsia 20 krasavika 1963 hoda ŭ vioscy Rovienskaja Słabada Rečyckaha rajona Homielskaj vobłaści. Heta dastatkova vialikaja vioska, jašče naprykancy XIX stahodździa tam žyło bolš za tysiaču žycharoŭ. U saviecki čas tam byŭ cahlany zavod, tartak, młyn, siaredniaja i muzyčnaja škoły, kłub, mahazin i šmat usiaho inšaha. Ciapier taksama, skažam, škoła ŭ Rovienskaj Słabadzie moža ździvić i haradžan štučnym pakryćciom futbolnaha pola. Ciapier pasielišča maje status ahraharadka.
Uładzimira Dvornika vyhadavała adna maci. Natalla Antonaŭna praciahvaje žyć u rodnaj vioscy na vulicy Kalinaŭka. «Ja i raniej jaho nie bačyła, a ciapier zusim nie pabaču», — skazała jana nam, kali daviedałasia pra pieravod syna ŭ Minsk. Praŭda, susiedzi raskazvajuć, što Uładzimir Andrejevič u rodnych miaścinach byvaje dastatkova časta.
Mama vice-premjera pracavała dajarkaj u kałhasie, a baćki nie było. Jon nie žyŭ razam ź siamjoj, a pamior, kali Uładzimir chadziŭ jašče ŭ pačatkovuju škołu.
Adzin brat u Rasii, druhi pamior
Va Uładzimira Dvornika było dvoje bratoŭ. Ciapier zastaŭsia tolki adzin. Starejšy brat usio žyćcio adpracavaŭ šafioram u kałhasie vioski Chomičy Kalinkavickaha rajona. Litaralna tydzień tamu jon pajšoŭ z žyćcia. Druhi brat słužyć praparščykam u Rasii. Kažuć, što zastaŭsia tam paśla słužby ŭ vojsku.
Adnakłaśnica Uładzimira Dvornika raskazała nam, što vučyŭsia jon siarednie, nikoli nie byŭ siarod najlepšych vučniaŭ kłasa. «Zdajecca, matematyku lubiŭ. Litaraturu. Čamu my litaratury lubili? Bo nastaŭnicy maładyja byli», — raskazali nam u Rovienskaj Słabadzie.
Vučycca Uładzimir Dvornik pieršapačatkova pajšoŭ u Rečycki zoavieterenarny technikum. «Maci jamu skazała, kab išoŭ u inšuju haspadarku, bo tut jon usio žyćcio budzie Vałodziem, a tam budzie Uładzimiram Andrejevičam», — tłumačać miascovyja, čamu na radzimie jon tak i nie pracavaŭ.
Kim byŭ da vysokich pasadaŭ
Pieršym miescam pracy byŭ kałhas «Uschod» Naraŭlanskaha rajona. Jon tam pracavaŭ vieterynaram. U hety samy čas zavočna skančvaje Viciebski vieterynarny instytut. Za niejki čas Dvornik pierajšoŭ pracavać u kałhas «Družba» Mazyrskaha rajona, dzie i staŭ rabić sabie karjeru.
Tam jon dasłužyŭsia da namieśnika staršyni kałhasa, paśla heta Uładzimira zabrali ŭ horad, dzie Dvornik staŭ hałoŭnym vieterynarnym doktaram Mazyrskaha rajona. Adnak praź niejki čas čynoŭnik znoŭ adpraŭlajecca «ŭ pole».
Jon uznačalvaje saŭhas-kambinat «Zara». Mienavita pry Dvorniku heta haspadarka stała adnoj z najmacniejšych u krainie. Vytvorčaść vyrasła ŭ 20 razoŭ, było adkryta 20 ułasnych kramaŭ.
Jaho zaŭvažajuć, i ŭ 2009 hodzie Uładzimir Dvornik stanovicca staršynioj Mazyrskaha rajvykankama, a praz hod, u 2010-m, jaho pryznačajuć staršynioj Homielskaha abłvykankama.
Jak kiravaŭ vobłaściu
Uładzimir Dvornik byŭ daloka nie samy zaŭvažny staršynia abłvykankama, ale pry hetym na svajoj pasadzie jon pratymaŭsia bolš za ŭsich sa svaich ciapierašnich kaleh.
U 2014 hodzie Śledčym kamitetam byli zatrymanyja adrazu dvoje namieśnikaŭ Dvornika — Bančuk i Tryzna. Ich vinavacili va złoŭžyvańni słužbovymi paŭnamoctvami. Łukašenka vynies Dvorniku vymovu, ale ŭ adstaŭku nie adpraviŭ. A ŭ 2016 hodzie kiraŭnik dziaržavy ŭručyŭ kiraŭniku Homielskaj vobłaści Orden Ajčyny III stupieni.
Dvornik zapomniŭsia tym, što sprabavaŭ abmiežavać u Homieli prodaž ałkaholu ŭ načny čas, ale hety ekśpierymient ničym nie zaviaršyŭsia. Alimpijskuju čempijonku Ału Cupier staršynia abłvykankama ŭznaharodziŭ sapraŭdnym bryljantam pamieram 0,64 karata.
A voś siaredni zarobak da ŭzroŭniu 500 dalaraŭ, jak abiacaŭ Łukašenku, Uładzimir Dvornik u Homielskaj vobłaści tak i nie vyvieŭ.
Syn kiruje toj ža haspadarkaj, što i baćka
Va Uładzimira Dvornika adzin syn Dźmitryj. Jon skončyŭ Biełaruski handlova-ekanamičny ŭniviersitet spažyŭkaapieracyi. Ciapier Dźmitryj Uładzimiravič uznačalvaje haspadarku «Zara» Mazyrskaha rajona — tuju samuju, jakoj kaliści kiravaŭ jahony baćka.
«Naša pieravaha pierad usimi astatnimi — heta ŭłasnaja pradukcyja najvyšejšaj jakaści. Cech pierapracoŭki miasnoj syraviny pracuje štodnia, jaho mahutnaści vykarystoŭvajucca efiektyŭna, syravina pierapracoŭvajecca svoječasova. Dastaŭka tavaru ŭ firmovuju sietku prachodzić kožny dzień u abstalavanych chaładzilnymi ŭstanoŭkami furhonach», — raskazvaŭ pra «Zaru» Dźmitryj Dvornik.
Ciapier čytajuć
U Pskovie rasijanin zabiŭ biełarusa Valeryja za toje, što toj patrabavaŭ pavažać biełaruskuju nacyju10
Kamientary