Ukrainiec, nibyta zavierbavany ŭ Biełarusi, zdaŭsia ŭ SBU i nazvaŭ imia kuratara
Hramadzianin Ukrainy, abvinavačany ŭ «dziaržaŭnaj zdradzie i dapamozie pradstaŭnikam zamiežnaj dziaržavy ŭ praviadzieńni padryŭnoj dziejnaści suprać ukrainskaj dziaržavy», paźbieh kryminalnaj adkaznaści, bo dobraachvotna źviarnuŭsia ŭ Słužbu biaśpieki i nazvaŭ imia svajho vierbavalnika ŭ Biełarusi, piša Radyjo Svaboda.
Spravu, zaviedzienuju pavodle artykuła 111 Kryminalnaha kodeksu Ukrainy ab dziaržaŭnaj zdradzie, kalehija sudździaŭ Ratnaŭskaha rajonnaha suda Vałynskaj vobłaści razhladała 7 žniŭnia. Abvinavačanamu hramadzianinu pahražała pazbaŭleńnie voli na termin ad 12 da 15 hadoŭ z kanfiskacyjaj abo biez kanfiskacyi majomaści.
Jak vynikaje z materyjałaŭ kryminalnaj spravy, ukrainca ŭ druhoj pałovie kastryčnika 2017 hoda nibyta zavierbavaŭ supracoŭnik Upraŭleńnia finansavych rasśledavańniaŭ Kamiteta dziaržaŭnaha kantrolu Bresckaj vobłaści Uładzisłaŭ Ł..
Heta adbyłosia ŭ Kobrynie, dzie ŭ toj čas znachodziŭsia hramadzianin Ukrainy. Jon śćviardžaje, što pahadziŭsia na supracu ŭ vusnaj i piśmovaj formie, paabiacaŭšy źbirać infarmacyju pra sistemu achovy dziaržaŭnaj miažy Ukrainy i asabisty skład pamiežnych padraździaleńniaŭ na pamiežnym učastku Ratnaŭskaha rajona Vałynskaj vobłaści.
Na apošniaj sustrečy, jakaja adbyłasia sioleta 22 sakavika, Uładzisłaŭ Ł. nibyta pastaviŭ pierad ukraincam jašče adno zadańnie — sabrać i pieradać jamu infarmacyju ab asabistym składzie supracoŭnikaŭ miascovaha terytaryjalnaha padraździaleńnia ŭpraŭleńnia SBU ŭ Vałynskaj vobłaści.
Nieŭzabavie paśla hetaj sustrečy ŭkrainiec vyrašyŭ źviarnucca ŭ SBU i paviedamić ab svaim vierbavańni. Dziakujučy hetamu jamu ŭdałosia paźbiehnuć kryminalnaj adkaznaści — jon pierakanaŭ sud u tym, što nie pieradavaŭ vierbavalniku sakretnaj infarmacyi.
U Kamitecie dziaržkantrolu Biełarusi paćvierdzili, što taki supracoŭnik u ich jość, ale ad kamientara, ci moh jon vierbavać ukrainskich hramadzian, admovilisia. Z samim supracoŭnikam KDK, jaki nibyta vierbavaŭ ukrainca, źviazacca nie ŭdałosia.
Heta čaćviorty viadomy vypadak, kali ŭkraincaŭ nibyta vierbavali biełaruskija śpiecsłužby, i pieršy, kali nazyvajecca imia mierkavanaha vierbavalnika.
Paśla pieršych anałahičnych historyj u pres-centry Słužby biaśpieki Ukrainy Svabodzie zajaŭlali, što takija fakty fiksujucca «amal sistematyčna». Što praŭda, pra ich nikoli nie paviedamlajuć aficyjna — usie jany stali viadomyja paśla publikacyi sudovych rašeńniaŭ ab zakryćci kryminalnych spraŭ suprać ukraincaŭ, jakija dobraachvotna paviedamili SBU pra svajo vierbavańnie.
Kamientary