Taksama źjavilisia novyja pradstaŭniki našaj krainy ŭ Vialikabrytanii, Aŭstryi, Niderłandach i Kazachstanie.
Cełych dvanaccać hadoŭ Biełaruś i ZŠA nie byli pradstaŭlenyja adna ŭ adnoj na ŭzroŭni pasła. Dypłamatyčny skandał pačaŭsia ŭ 2008: kali ZŠA ŭviali novyja ekanamičnyja sankcyi suprać Biełarusi, to aficyjny Minsk adreahavaŭ skaračeńnie štata supracoŭnikaŭ pasolstva ZŠA z 35 da 5 čałaviek. Amierykancy navat chacieli zakryć svaju ambasadu. Minsk adklikaŭ z Vašynhtona pasła Michaiła Chvastova i nastojliva rekamiendavaŭ pakinuć našu krainu pradstaŭnicy Amieryki Karen Ściuart.
Ad taho momantu ni Biełaruś nie była pradstaŭlena ŭ Vašynhtonie pasłom, ni ZŠA — u Minsku.
Novym pradstaŭnikom Biełarusi ŭ ZŠA staŭ były namieśnik ministra zamiežnych spraŭ Aleh Kraŭčanka. Jamu 49 hadoŭ, minčuk. U MZS ad 1994 hoda. U pieryjad z 2007 pa 2014 hod pracavaŭ spačatku daradcam pasolstva Biełarusi ŭ ZŠA, a paśla časovym pavieranym.
Palityčny ahladalnik Raman Jakaŭleŭski kaža, što apošnim časam Kraŭčanka vykonvaŭ rolu «kantaktnaj asoby» na pieramovach u Jeŭrasajuzie, a taksama na mnohich mierapryjemstvach u ZŠA. «Dla jaho heta znajomaja praca, a kali ŭličyć pazityŭnuju dynamiku dla biełaruskich uładaŭ adnosin z ZŠA, to pracavać jamu tam budzie cikava. Zrešty, ad roli pasła zaležyć nie tak šmat, jana chutčej vykanaŭčaja».
Taksama Jakaŭleŭski adznačaje, što Kraŭčanka byŭ adnym z kurataraŭ «Minskaha dyjałohu». Ci budzie jon praciahvacca ŭžo biez eks-namieśnika ministra, analityk mocna sumniavajecca.
Pieršy namieśnik ministra zamiežnych spraŭ Andrej Jeŭdačenka jedzie pradstaŭnikom našaj krainy ŭ Niderłandy. Jeŭdačenku 62 hady, u struktury MZS — ad 1990 hoda. Raniej pabyŭ pasłom Biełarusi ŭ Vienhryi i Bielhii.
«Pra hetaje pryznačeńnie było viadoma daŭno, Jeŭdačenka — daśviedčany dypłamat, a Niderłandy — adzin z najvažniejšych hadlovych partnioraŭ Biełarusi», — kaža Jakaŭleŭski.
Jašče adzin namieśnik Makieja pa MZS Andrej Dapkiunas jedzie pasłom Biełarusi ŭ Aŭstryi. Dapkiunas na praciahu amal trynaccaci hadoŭ uznačalvaŭ pradstaŭnictva Biełarusi pry AAN.
«Važnaja pasada. Mahčyma, mienavita Dapkiunasu daviadziecca vybudoŭvać dyjałoh miž Biełaruśsiu i Jeŭrasajuzam paśla 9 žniŭnia, na jahonuju misiju buduć uskładacca vialikija nadziei. Jon karystajecca vialikim aŭtarytetam u dypłamackim korpusie. Heta pazityŭnaje pryznačeńnie», — adznačaje spadar Jakaŭleŭski.
Pasłom Biełarusi ŭ Łondan pajedzie były ministr finansaŭ Maksim Jermałovič. Jon mieŭ reputacyju «paŭrynačnika», ale ŭ novym uradzie Ramana Hałoŭčanki jamu miesca nie znajšłosia.
Były ministr pramysłovaści Pavieł Uciupin jedzie pradstaŭnikom Biełarusi ŭ Kazachstan. Da hetaha pradstaŭnictva tam uznačalvaŭ taksama eks-ministr, tolki architektury i budaŭnictva — Anatol Ničkasaŭ.
Ciapier čytajuć
«Ja tak daloka zabrałasia. Škada tolki, što nie mahu pakazać heta tatu». Jak žyvie dačka Paŭła Šaramieta praz 10 hadoŭ paśla jaho hibieli7
«Ja tak daloka zabrałasia. Škada tolki, što nie mahu pakazać heta tatu». Jak žyvie dačka Paŭła Šaramieta praz 10 hadoŭ paśla jaho hibieli
Statkievič ab pratestach va Ukrainie: Kali vy abrali z takoj pieravahaj prezidenta i adnačasova Viarchoŭnaha hałoŭnakamandujučaha, to dajcie jamu kiravać2424
Kamientary