Pry budaŭnictvie damoŭ u Homieli staviać boksy dla kandycyjanieraŭ — ale ad hetaha žycharam budzie tolki horš
Novyja damy ŭ Homieli pačali rabić sa śpiecyjalnymi košykami dla kandycyjanieraŭ dziela zachavańnia vonkavaha vyhladu fasadaŭ. Adnak heta stvaraje prablemy dla žylcoŭ, piša «Fłahštok».
Padčas budaŭnictva novych damoŭ u Homieli pašyrajuć praktyku ŭstanoŭki boksaŭ dla kandycyjanieraŭ na fasadzie. Adzin z prykładaŭ — šmatpaviarchoviki na vulicy Kosarava, na jakija źviarnuli ŭvahu «Mocnyja Naviny».
Novaŭviadzieńnie prakamientavali ŭ sacsietkach miascovyja śpiecyjalisty i adznačyli, što jano nie zrobić mantaž techniki praściejšym dla žycharoŭ — naadvarot:
«Košyki raźmieščanyja ŭ maksimalna nievyhodnych miescach, što viadzie da padaražańnia mantažu kandycyjaniera i jaho dalejšaha absłuhoŭvańnia. I takaja situacyja va ŭsich damach pa horadzie, dzie praduhledžanyja takija «palapšeńni». Źniešni vyhlad — tak, ale dla haspadara kvatery — nie».
Śpiecyjalisty patłumačyli, što zvyčajnyja mantažniki nie daciahnucca da boksaŭ, tamu i dla ŭstanoŭki, i dla absłuhoŭvańnia kandycyjaniera daviadziecca zamaŭlać pasłuhi pramysłovaha alpinista.
Miarkujučy ź dziaržzakupak, damy na Kosarava ŭzvodziŭ Homielski domabudaŭničy kambinat, a samo noŭ-chaŭ pieraniali z Rasii, adznačyli ŭ kamientarach.
Tam taksama daŭno krytykujuć novaŭviadzieńnie i nahladna tłumačać, čym jano abierniecca na praktycy: žychary ŭstaloŭvajuć kandycyjaniery prosta pad voknami, a boksy zastajucca pustymi.
Pad adnym ź videa patłumačyli:
«Jość takoje paniaćcie standartny mantaž — vonkavy błok pad akno. Na videa — ustanoŭka ŭ košyk z alpinistam, suma pavialičvajecca na košt pasłuhi. I dalej usie ruchi z vonkavym błokam, dazapraŭka, čystka — zaŭsiody budzie alpinist».
Z takim mierkavańniem u kamientarach pahadzilisia i dadali:
«Tańniej pastavić pad akno, tamu što košyki ŭ niedastupnym z akna miescy stajać. Alpinisty i aŭtavyški kaštujuć kuču hrošaj, i dla absłuhoŭvańnia taksama znoŭ za dostup kuču babła advalvać treba, a pad aknom abo zboku ad akna ŭ dastupnym miescy ŭstaloŭvać lahčej i tańniej, i možna lohka absłuhoŭvać klimatyčnuju techniku».
U Biełarusi dla ŭstanoŭki kandycyjaniera nieabchodna atrymlivać uzhadnieńnie ŭ miascovaj ŽKH. Tamu žycharoŭ damoŭ z boksami mohuć abaviazać stavić kandycyjaniery tolki ŭ košyki.
Ciapier čytajuć
Prapahanda pryčapiłasia da «darahoha» hadzińnika Łatuški. Toj raskazaŭ, što heta za madel nasamreč27
Kamientary
Bastyjon biełaruščyny...
Košyk umanciravany tak, kab vaš kandycyjanier nie barabaniŭ susiedziam pa padvakońni.