«Nadzieja Ściapanaŭna». Mikita Najdzionaŭ apublikavaŭ paemu, jakaja naradziłasia ŭ Žodzinskaj turmie. Takoha paetyčnaha epasu ŭ biełaruskaj paezii XXI stahodździa jašče nie było

Try hady tamu, kali ja trapiŭ u žodzinskuju turmu, to, pazbaviŭšysia svabody i zvykłych abstavinaŭ, staŭ šukać sposab niejak zachavać siabie i źviarnuŭsia da paezii, jak rabiŭ raniej u luboj niezrazumiełaj situacyi.

Bliziŭsia dzień narodzinaŭ majoj babuli, Nadziei Ściapanaŭny. I ja zachacieŭ napisać dla jaje vinšavalny vierš. Pačaŭ pisać, a vierš nijak nie zakančvaŭsia. I ja pačaŭ zadumvać bujnuju formu, svaju pieršuju paemu. Heta było hłybokaje zanureńnie ŭ historyju majoj siamji, u majo dziacinstva z refleksijami siońniašnich abstavinaŭ. Miarkuju, kali b nie turma, naŭrad ci b ja napisaŭ takuju reč. «Paeterapija praź vieršy i jość niezavieršanaść».

Kali hod tamu ja ŭpieršyniu publična pračytaŭ paemu, to adčuŭ siabie niejmavierna ŭraźlivym i biezabaronnym. Mahu skazać, heta najlepšaje, što ja niekali napisaŭ. Hetaja paema ŭvojdzie ŭ maju nastupnuju knižku. Całkam jana vyjšła ŭ śviežym numary «Apostrafa». A pałova paemy — na Bellit.info. A jašče vieru, što niekali jana budzie pastaŭlena jak dramatyčny tvor.

Pračnucca a piataj,
azvacca na imia i proźvišča.
Dušoju napiataj
u dumkach irvacca da rodzičaŭ.

Pakul na bietonie
ŭsie spali, nakryŭšysia kurtkami,
ja dumaŭ byŭ toje:
chiba za nas mała pakutavali?

Niaŭžo tak daremna
babula hibieła na Poŭnačy,
piłujučy drevy
až ruk ad marozu nie pomniačy?

Niaŭžo nie davoli,
što mama žyćcio pierajnačyła,
bo stała ŭdavoju
ledź tryccacihodździe adznačyła?

Ni kiepskim nastrojem
ni drobnym paprokam nie vydała,
jak ciažka ź siastroj nas
było hadavać, ale vyhadavała.

Navošta ŭsio heta,
kali my nie budziem ščaślivymi:
biaskoncaje leta
i lecišča ź dzikimi ślivami?

Niaŭžo my naščadki
niaspraŭdžanych cynkavych chłopčykaŭ
i stavim na ščaście,
a ščaścia napraŭdu ci chočacca?

Navošta imkniemsia
daśledavać Miesiaca kratery,
kali apyniemsia
na miesiacy sami za kratami?

Dziaciej naradžajem
usim niebiaśpiekam nasupierak.
I ŭśled za daždžami
adrazu čakajem nastupnyja.

Žyviem u nadzionnym
z nadziejaj na lepšaje viečnaje.
I raptam: «Najdzionaŭ,
na vychad źbirajemsia z rečami».

A voś jašče adzin uryvak:

Ja dumaŭ, što vyras
u domie i… z doma baćkoŭskaha.
I prosta jak vyraz
ciahnusia radkami i koskami.

Dy byccam by hreje,
što ŭ dumkach damoŭ pavaročvaju.
Usie batarei
źličyŭ tam zubami małočnymi.

Tam vokny staryja,
i ŭviesnu na kožnym ź ich sadžancy.
Małodšy ŭ siastry ja
i mamie pa drobiaziach skardžusia.

A mama abdymie
i skaža mnie słovy piaščotnyja,
i słovami tymi
haračaje niešta na ščoki lje.

Adčuje ŭsim ciełam,
što hetyja ślozy chłapiečyja
jość tym, što chacieła
sama, jak była niedapieščanaja.

I štości jak ščoŭknie,
parviecca starymi zapłatkami.
Pa kropli piaščotaj
napoŭnicca serca zapłakanaje.

Ja dumaŭ, što vyras,
što vytras albomy dziciačyja.
Dom ciahnie jak vyraj,
hady adlatajuć dziasiatkami.

Tam pieršyja kroki
miažujucca ź pieršymi jambami.
Pad soncam vysokim
u sadzie vysokija jabłyni.

I lipień adlity
daždžami, i ja, što narodžany,
kab ślozy ad litar
kacilisia, niby harošyny.

I mama harochu
narvie mnie sałodka-sałodkaha.
I budzie ŭ darohu
pravodzić daloka-dalokuju.

Mikita Najdzionaŭ — biełaruski paet i muzyka, były frantmien hurta Hurma.

Najdzionava zatrymali 25 sakavika 2023 hoda. Jaho abvinavačvali pavodle art. 342 KK «Arhanizacyja i padrychtoŭka dziejańniaŭ, jakija hruba parušajuć hramadski paradak, albo aktyŭny ŭdzieł u ich». Pravaabarončaja supolnaść Biełarusi pryznała Najdzionava palitviaźniem.

Z kanca krasavika jon znachodziŭsia ŭ SIZA № 8 Žodzina. U lipieni jaho pieraviali sa Śledčaj turmy № 8 u SIZA-1 u Minsku.

24 lipienia 2023 hoda sudździa Maryna Klimčuk u sudzie Leninskaha rajona Minska vyniesła Mikitu Najdzionavu prysud. Jamu dali 3 hady abmiežavańnia voli biez nakiravańnia ŭ papraŭčuju ŭstanovu adkrytaha typu («chatniaja chimija»). Paśla abnarodavańnia prysudu Najdzionava vyzvalili z-pad varty ŭ zale suda.

U kastryčniku 2023 hoda Mikita źjechaŭ ź Biełarusi. 

• 27
• 0
• 0
• 0
• 2
• 2
• 0
• 10