Mierkiel ašałomlena padziejami ŭ Biełarusi: Fundamientalnaje prava nie pavinna taptacca nahami
Kancler Anhieła Mierkiel rašučym čynam asudžaje prymianieńnie siły suprać mirnych demanstrantaŭ u Biełarusi; ŭrad Niamieččyny ŭzrušany paviedamleńniami pra žorstkaje abychodžańnie z zatrymanymi i ličyć, što ES pavinien abmierkavać sankcyi suprać adkaznych asob za parušeńni pravoŭ čałavieka. Pra heta zajaviŭ u piatnicu na bryfinhu aficyjny pradstaŭnik urada FRH Štefien Zajbiert, piša TASS.
«Ja chacieŭ by ad imia kanclera znoŭ rašuča asudzić prymianieńnie žorstkaha hvałtu suprać mirnych demanstrantaŭ», - skazaŭ jon.
«Kancler asabliva asudžaje, što tysiačy byli zatrymanyja prosta z-za ich udziełu ŭ mirnych pratestach, jana ŭzrušanaja paviedamleńniami ab tym, što ź imi žorstka abychodzilisia», - dadaŭ Zajbiert. Pavodle jaho słoŭ, heta, z punktu hledžańnia Bierlina, «nieprymalna».
«Biełaruś pavinna nieadkładna i biez papiarednich umovaŭ vyzvalić ludziej i zabiaśpiečyć ich prava na schody, vykazvańnie mierkavańnia i atrymańnie infarmacyi», - skazaŭ jon, pakazaŭšy na toje, što «vielmi mnohija ludzi» vyjšli na vulicy biełaruskich haradoŭ i skłali pracu na pradpryjemstvach, « kab mirna zajavić ab svaim palityčnym mierkavańni ». Pavodle jaho słoŭ, heta adlustroŭvaje niezadavolenaść i adčaj hramadzian krainy ŭ suviazi ź situacyjaj i padziejami vakoł prezidenckich vybaraŭ.
«Urad Niamieččyny padtrymlivaje ŭsich ludziej, jakija mirna vykazvajuć svaju volu, što ŭ demakratyi źjaŭlajecca pravam kožnaha asobnaha čałavieka. Toje, što ciapier heta fundamientalnaje prava ŭ Biełarusi topčuć nahami, nieprymalna», - praciahvaŭ Zajbiert.
«Niamieččyna abmiarkuje siońnia ŭ Saviecie ES padziei ŭ Biełarusi. Na naš pohlad, pry hetym treba budzie abmierkavać sankcyi suprać tych, chto niasie adkaznaść za parušeńni pravoŭ čałavieka», — adznačyŭ Zajbiert.
Ciapier čytajuć
Zahnuŭsia biznes člena chakiejnaj kamandy Łukašenki, jaki abiacaŭ pabudavać łyžny maniež za Viarchoŭnym sudom uzamien na łasyja ŭčastki3
Kamientary