U Pskovie zatrymali śledčaha ź Biełarusi, jaki ŭ raparcie na zvalnieńnie na 5 staronkach krytykavaŭ toje, što adbyvałasia ŭ apošnija tydni

U Pskovie zatrymali biełarusa Andreja Astapoviča, jaki niekalki dzion tamu raźmiaściŭ na svajoj staroncy ŭ Instagram fatahrafii raparta na zvalnieńnie z pazicyi staršaha śledčaha Partyzanskaha rajonnaha adździeła SK. Pra heta TUT.BY raspaviali siabry Andreja i advakat, jakoha jany naniali.

Jak paviedamlajecca, mužčyna sprabavaŭ źjechać praz Rasiju ŭ Łatviju, ale praz abmiežavańni na vyjezd praz karanavirus nie zmoh heta zrabić. A paźniej byŭ zatrymany, ciapier znachodzicca ŭ adnym z adździełaŭ milicyi Pskova. Advakat nie moža da jaho patrapić. Jak paviedamili TUT.BY u SK, Andrej Astapovič užo nie pracuje ŭ viedamstvie.

Pavialičyć

«Maŭčać nie budu, udzielničać va ŭtojvańni złačynstvaŭ nie budu»

Hetaja historyja pačałasia z taho, što Andrej Astapovič niekalki dzion tamu raźmiaściŭ na svajoj staroncy ŭ instahramie post z fatahrafijaj raparta na zvalnieńnie. Na fota paznačana, što mužčyna inicyjuje daterminovaje skasavańnie kantrakta z 16 žniŭnia praz «parušeńni jaho ŭmoŭ z boku kiraŭnictva SK». Tekst zajavy atrymaŭsia na 5 listoŭ.

Pavialičyć

Ale praź niekatory čas post byŭ vydaleny z farmuloŭkaj «bo jon parušaje praviły supolnaści». Adnak zdymki zajavy na daterminovaje spynieńnie kantrakta, jakija raźmiaściŭ Andrej Astapovič, pa-raniejšamu možna znajści na staronkach niekatorych ŚMI. 

Andrej piša, što pa Kanstytucyi «ŭsie roŭnyja pierad zakonam i majuć prava biez usiakaj dyskryminacyi na roŭnuju abaronu pravoŭ i zakonnych intaresaŭ».

Andrej Astapovič piša, što sam asabista prysutničaŭ na mitynhach. Na jaho dumku, ładzili pravakacyi siłaviki. «Nazvanaje paćviardžajecca tym, što, jak tolki dali kamandu ŭcichamirycca, luboha rodu sutyknieńni spynilisia», — adznačyŭ Andrej.

Mužčyna śćviardžaje, što mnohija kryminalnyja spravy praz supraciŭ pravaachoŭnikam, jakija byli zaviedzienyja praz apošnija padziei, adkrytyja nieabhruntavana, «biez najaŭnaści dakładnych dokazaŭ abo pa sfalsifikavanych dokazach, iłžyvych pakazańniach».

Andrej Astapovič pryznajecca, što «nie choča adčuvać dziki soram ad stasunkaŭ z hramadzianami, ad źjaŭleńnia ŭ formie ŭ horadzie».

«Maŭčać nie budu, udzielničać va ŭtojvańni złačynstvaŭ nie budu, złačynnyja zahady vykonvać nie budu, praciahvać pracu ŭ siłavym błoku nie mahu z pryčyny nieadpaviednaści maich pryncypaŭ z sapraŭdnaj palitykaj, — napisaŭ Andrej. — Prašu, kalehi, apamiatajciesia, ratujcie siłavy błok».

TUT.BY źviarnujsia pa kamientar u pres-słužbu Śledčaha kamiteta. «Nazvany hramadzianin nie źjaŭlajecca supracoŭnikam Śledčaha kamiteta. Infarmacyi ab jaho zatrymańni Śledčy kamitet nie maje», — udakładnili va ŭpraŭleńni SK pa Miensku.

«Ja prosta nie vyjšaŭ by z takim rapartam»

Siońnia z redakcyjaj TUT.BY źviazalisia siabry Andreja i paviedamili, što jaho zatrymali ŭ Pskovie i što jon znachodzicca ŭ adnym z adździełaŭ palicyi hetaha horada. Julija, siabroŭka Andreja, raspaviała, što paśla raźmiaščeńnia pasta jon na maršrutcy pryjechaŭ da jaje ŭ Maskvu.

Užo znachodziačysia ŭ Maskvie, Andrej Astapovič daŭ intervju telekanału «Dožd́». Jon siarod inšaha raspavioŭ, što pakinuŭ rapart u svaim kabiniecie i syšoŭ. «Ja prosta nie vyjšaŭ by z takim rapartam», — skazaŭ mužčyna.

Julija raspaviadaje, što Andrej pryniaŭ rašeńnie źjechać z Maskvy ŭ Łatviju. «Na nastupnuju ranicu paśla jaho pryjezdu pastupili źviestki ad kaleh, što jaho šukajuć. 19 žniŭnia my vyjechali z Maskvy i nakiravalisia na miažu z Łatvijaj. Noč z 19-ha na 20-ha my praviali na pamiežnym punkcie, z terytoryi RF praz abmiežavańni na vyjezd praz karanavirus, praz adsutnaść vizy jaho nie vypuścili», — kaža Julija.

Pavodle jaje słoŭ, u čaćvier i piatnicu ŭ Pskovie jany vyrašali vizavaje pytańnie praz konsulstva Łatvii ŭ hetym horadzie. U paniadziełak, 24 žniŭnia, Andreju abiacali vydać vizu, pa jakoj jon by moh pierasiekčy rasiejska-łatvijskuju miažu.

Adnak u piatnicu ŭviečary, jak raspaviadaje Julija, Andreja zatrymali i dastavili ŭ adździeł palicyi. «Zatrymali kala 20.00 niezrazumiełyja ludzi, jany zajšli ŭ numar, jaki byŭ zabraniravany na mianie. A 23.00 my z mužam daviedalisia, što Andrej u adździaleńni palicyi. Što jon žyvy, a supracoŭniki adździaleńnia čakajuć ranicy, kab źjaviŭsia kirujučy skład i skazaŭ, što ź im rabić dalej», — kaža Julija.

U adździele palicyi №1 UMVD Rasii pa Pskovie nie zmahli apieratyŭna paćvierdzić infarmacyju. Naniaty advakat śćviardžaje, što Andrej znachodzicca ŭ hetym adździaleńni palicyi, ale da jaho nie dapuskajuć. Advakat z hetaj nahody napisaŭ zajavu ŭ prakuraturu Pskova. Pa niekatoraj infarmacyi, suprać Andreja mohuć pačać administracyjny praces praź jaho pierasiačeńnie miažy ŭ pandemiju, u paniadziełak, chutčej za ŭsio, budzie sud.

Siabry Andreja aścierahajucca, što pa jakich-niebudź pryčynach jon budzie departavany dalej u Biełaruś.

• 0
• 0
• 0
• 0
• 0
• 0
• 0
• 0