U Homieli na «sutki» adpravili piensijanierku za karahod vakoł jalinki ŭ lesie
Sud Savieckaha rajonu Homla pakaraŭ aryštam na 7 sutak 59-hadovuju Ału K. Jaje abvinavacili va ŭdziele ŭ niesankcyjanavanym mitynhu. Tak sud rascaniŭ karahod u lesie vakoł jalinki, u jakim uziała ŭdzieł žančyna, piša Svaboda.
Spravu razhladaŭ sudździa Andrej Łahunovič.
25 śniežnia kala dziesiaci žycharoŭ Homla zładzili navahodni piknik u lesie. Jany ŭpryhožyli tam jalinku, palili vohnišča i vadzili karahod. Niekatoryja ŭdzielniki karahodu mieli bieł-čyrvona-biełyja ściahi. Na jalincy byli arkušy papiery z nadpisami «Pacuk, sychodź!» i «Ŭ Novy hod biez pacuka!».
5 studzienia pensijanerku Ału zatrymała milicyja. U jaje domie prajšoŭ vobšuk. Milicyja zabrała techniku (kamputar, dyski, telefony) i «bieł-čyrvona-bieły ściah z kvietkaj pasiaredzinie» (majecca na ŭvazie ściah BSDP. — RS). Pensijanerku zabrali na noč u IČU. 6 studzienia adbyŭsia sud.
Pavodle rapartu milicyi, pensijanerka «ŭ zahadzia damoŭlenym miescy, u lasnym masivie kala vioski Novaja Buchałaŭka pryniała aktyŭny ŭdzieł u niesankcyjanavanym mitynhu biez dazvołu harvykankamu».
«Ja nie liču, što karahod u lesie — mitynh. Ja nie liču siabie vinavataj. Kali navat vy kažacie, što ja była tam u čyrvonaj kurtcy — to što? Heta absurd — davać pakazańni pa takoj spravie», — skazała žycharka Homla.
Milicyjanty napisali ŭ raparcie, što zaŭvažyli ŭ telehramie videa ź pikniku ŭ lesie i «aperatyŭnym šlacham» vyznačyli, što ŭdzieł u «niesankcyjanavanym mitynhu» pryniała Ała.
Na sudzie vystupała śviedka, jašče adna žycharka Homla. Jana pakazała, što z Ałaj paznajomiłasia ŭ žniŭni na mirnych maršach. Sudździu cikaviła — u jakich telehram-supołkach udzielničali abiedźvie žycharki Homla, chto jašče byŭ na pikniku, ci była symbolika i chto vykłaŭ zapis u Telehram.
«To bok vy pili šampanskaje, viesialilisia i razmachvali bieł-čyrvona-biełymi ściahami? Dla čaho było ściahi z saboj brać? Vy ž vydatna razumiejecie, što, kab nia hetyja ściahi — vam by nichto i słova nie skazaŭ?» — udakładniaŭ sudździa.
Dziaŭčyna patłumačyła, što adkryta sa ściahami chadzić nielha, tamu jany vyrašyli skarystacca imi ŭ lesie.
Dziaŭčynu-śviedku taksama buduć sudzić na nastupnym tydni.
Kamientary