U vyniku sutyknieńniaŭ u rajonie budynka Kanhresa ZŠA ŭ Vašynhtonie z udziełam prychilnikaŭ Donalda Trampa zahinuli čatyry čałavieki. Pra heta, jak paviedamlaje Reuters, zajaviŭ kiraŭnik departamienta palicyi Vašynhtona Robiert Konci. U Kapitolii prachodziła pasiadžeńnie parłamienta, jaki zaćviardžaŭ pieramohu na vybarach prezidenta ZŠA Džo Bajdena.
Siarod zahinułych jość adzin zabity strełam z ahniastrelnaj zbroi. Raniej palicyja paćvierdziła hibiel žančyny, jakaja była ŭ liku tych, chto ŭvarvaŭsia ŭ budynak Kanhresa ZŠA. Charaktar traŭm inšych paciarpiełych u palicyi nie ŭdakładnili.
Pavodle paviedamleńnia palicyi, z momantu pačatku sutyknieńniaŭ byli zatrymanyja 52 čałavieki. Ź ich 47 zatrymali za parušeńnie ŭviedzienaj uładami Vašynhtona kamiendanckaj hadziny.
Palicyja vyjaviła i abiasškodziła dźvie samarobnyja vybuchovyja pryłady. Jany byli znojdzieny ŭ štab-kvaterach kamitetaŭ respublikanskaj i demakratyčnaj partyj. Raniej, na momant pačatku šturmu Kapitolija pratestoŭcami, stała viadoma, što ź niekalkich budynkaŭ, jakija ŭvachodziać u skład kompleksu, byŭ evakujavany piersanał u suviazi z paviedamleńniami ab samarobnych bombach i vybuchach.
6 studzienia prychilniki Donalda Trampa prarvali ačapleńnie i ŭvarvalisia ŭ budynak Kanhresa ZŠA ŭ Vašynhtonie. Jany pierapynili pasiadžeńnie kanhresa, pryśviečanaje zaćviardžeńniu vynikaŭ prezidenckich vybaraŭ. Častka kanhresmienaŭ była evakujavanaja z Kapitolija. Paśla taho, jak praź niekalki hadzin palicyja i siły biaśpieki vycisnuli pratestoŭcaŭ z budynka Kanhresa ZŠA, pasiadžeńnie adnaviłasia.
Kamientary