Vybuch 4 lipienia: kamu vyhadna i chto vinavaty

Užo prajšoŭ hod paśla vybuchu 4 lipienia ŭ Minsku. Niazdolnaść siłavikoŭ adšukać vinavatych Łukašenka nazvaŭ «hańbaj milicyi». Vidavočna, što ŭłada niazdolnaja adkazać na samyja važnyja pytańni, źviazanyja sa zdareńniem. Piša Andrej Lachovič.

Kamu vyhadna?

Heta pieršaje pytańnie, na jakoje pavinny adkazać tyja, chto šukajuć złačyncaŭ. Vielmi małavierahodna, što vybuch byŭ nakiravany suprać kankretnych ludziej — hledačoŭ kancertu. U ciemry i siarod natoŭpu było vielmi składana vyznačyć ludziej, jakija mahli by być abjektam napadu. Kali b chtości vyrašyŭ učynić napad na kankretnych ludziej, jon by vybraŭ inšaje miesca i čas.

Heta dazvalaje vykraślić ź śpisu padazravanych jakija-niebudź kryminalnyja struktury.

Niama padstavaŭ mierkavać, što metaj vybuchu byli centralnyja piersony śviatočnaha mierapryjemstva — Łukašenka, ci chtości z pradstaŭnikoŭ viarchoŭki ŭłady. Vybuch byŭ učynieny dastatkova daloka ad miescaznachodžańnia Łukašenki. Było vidavočna, što pacierpiać vypadkovyja, zvyčajnyja ludzi.

Metaj vybuchu było samo śviatočnaje mierapryjemstva — aficyjny Dzień niezaležnaści. Dla taho, kab pasiejać paniku, byŭ raźličany sam vybuch. Vybuchovaja chvala biła pa nahach. Pavinna była paciarpieć jak maha bolšaja kolkaść ludziej.

Toje, što ŭ suviazi z vybucham byli zatrymanyja niekatoryja aktyvisty apazicyi, śviedčyła, što ŭłada šukaje nie tam. Navat kali aficyjnaje śviata niezaležnaści adznačajecca 3 lipienia, i pad čyrvona-zialonymi ściahami, dla niazhodnych z Łukašenkam heta dobraja padzieja. Šmat chto ź ich prajšli praz represii, aryšty, zvalnieńni, za toje što kazali pra pahrozu niezaležnaści ŭ toj čas, kali Łukašenka abdymaŭsia z chvorym Jelcynym i šmat kazaŭ pra «sajuznuju dziaržavu» i «intehracyju».

Absalutna niepierakanaŭčaj źjaŭlajecca viersija, byccam vybuch učyniła ŭłada dla taho kab abvinavacić, dyskredytavać apazicyju pierad parłamienckimi vybarami (adbylisia 28 vieraśnia 2008 h.) Pa-pieršaje, vialiki natoŭp na aficyjnym mierapryjemstvie u Dzień niezaležnaści patrebny Łukašenku dla taho, kab prademanstravać, što jon maje padtrymku. Łukašenka nie choča być hubiernataram «paŭnočna-zachodniaha kraju» Rasiei. Pa-druhoje, parłamienckija vybary nie źjaŭlajucca u Biełarusi nastolki važnaj padziejaj, kab tre było pravodzić pierad imi takuju padrychtoŭku. Pa-treciaje, u ciapierašnim stanie apazicyja nie źjaŭlajecca nastolki mocnaj pahrozaj dla ŭłady, kab dla jaje dyskredytacyi tre było ŭčyniać vybuch.

Vybuch učynili tyja, chto mieŭ dla hetaha adpaviednuju i vialikuju matyvacyju. Dla kaho demanstracyja ŭładaj padtrymki niezaležnaści Biełarusi — źjava, jakuju vielmi ciažka ciarpieć, ź jakoj vielmi ciažka albo niemahčyma prymirycca.

Kali b ni byŭ aficyjny Dzień niezaležnaści Biełarusi — heta budzie śviata niezaležnaści ad Rasii. I takim čynam heta budzie razhladacca šmat kim u Rasii.

Akramia matyvacyi zakazčykaŭ, treba mieć na ŭvazie vysoki prafiesijanalizm vykanaŭcy.

Vybuch byŭ vykanany vielmi prafiesijna. Z dakładna raźličanym dziejańniem i efiektam. I vielmi vysokaj pierakananaściu, što vykanaŭca nie budzie schopleny, asudžany, nie budzie hutaryć sa śledčymi.

Akramia vialikaj matyvacyi heta zrabić, nieabchodna mieć adpaviednyja resursy dla taho, kab apłacić pracu prafiesijanała. I treba viedać, dzie možna znajści prafiesijanała, jaki ŭsie vykanaje dakładna i nie budzie zbojaŭ.

Jeść dastatkova padstavaŭ kazać, što vybuch byŭ zamoŭleny adnoj ź biznes-palityčnych hrupaŭ Rasiei.

Naŭrad ci rasiejskaje kiraŭnictva maje dačynieńnie da vybuchu. Jak kažuć, «u Kramla šmat viežaŭ». I adna «vieža» moža i nie mieć poŭnaj infarmacyi, što robić inšaja, mienšaja. Taksama jak i naŭrad ci Pucin addavaŭ zahad ab zabojstvie byłoha supracoŭnika FSB Litvinienki ŭ Łondanie u 2006 h. Ale Litvinienka — zdradnik dla tych, chto vyznačaje palityku i kantraluje ekanomiku ŭ Rasii. Jon pavinien byŭ pamierci.

Chto vinavaty?

Vybuchi nie adbylisia padčas anałahičnych padziejaŭ, śviataŭ niezaležnaści ŭ inšych postsavieckich krainach. Urady inšych respublik byłoha Savieckaha Sajuzu ad pieršych dzion niezaležnaści nie kazali, što ukraincy, uźbieki i h.d. — heta ruskija. Sa znakam jakaści ci biez. I nikoli nie handlavali niezaležnaściu. Nie kazali pra «sajuznuju krainu», nie zmahalisia za zvańnie «łakamatyva intehracyi» z Rasiejaj.

Jak ni paradaksalna, rusifikacyja, jakuju praciahvaje pravodzić ciapierašniaja ŭłada, razmovy pra intehracyju z Rasiejaj, nie stvarajuć biaśpieku ad paŭtareńnia trahiedyi 4 lipienia, a stvarajuć pahrozu paŭtareńnia takich zdareńniaŭ. Vieści razmovu pra šyrokuju intehracyju z Rasijaj i nie rabić adpaviednych krokaŭ, adčuvać siabie pry hetym u biaśpiecy — nie atrymajecca.

• 0
• 0
• 0
• 0
• 0
• 0
• 0
• 0