Biełaruś hieapalityčna pradvyznačana da źniešniaj palityki, u jakoj metaj źjaŭlajucca dobryja adnosiny jak z Zachadam, tak i z Uschodam.
Ab hetym zajaviŭ ministr zamiežnych spraŭ Biełarusi Siarhiej Martynaŭ, adkazvajučy na pytańnie infarmahienctva Agence Europe.
«Dla krainy, raźmieščanaj pamiž dźviuma bujnymi suśvietnymi siłami, inšaha vybaru niama», — rastłumačyŭ kiraŭnik MZS. «My nie budujem družbu za košt inšych. I ŭ płanie raźvićcia adnosin ź ES dla nas pryncypova, što my nie źbirajemsia vybirać pamiž družbaj z Rasijaj i družbaj ź Jeŭrasajuzam», — padkreśliŭ jon.
U suviazi z hetym Siarhiej Martynaŭ vyklučyŭ jaki‑niebudź antahanizm pamiž intehracyjaj Biełarusi z Rasijaj i intehracyjaj u ramkach «Uschodniaha partniorstva».
«Bolš taho, Biełaruś maje vielmi prahmatyčnuju zacikaŭlenaść u bolšaj kansalidacyi Jeŭropy — ja maju na ŭvazie Jeŭropu ŭ šyrokim sensie słova: uklučajučy i Jeŭrasajuz, i SND», — zajaviŭ ministr.
Značyć, dadaŭ jon, udzieł Biełarusi va «Uschodnim partniorstvie» vyhadny i Rasii. «Naprykład, my prapanavali ŭ jakaści prajekta pašyreńnie mižnarodnaha transpartnaha kalidora 9V da Kalininhrada i zatym na poŭdzień u napramku Čornaha mora, što złučyć Bałtyjskaje i Čornaje mory. Heta budzie stratehičnaja suviaź, i, dumaju, Rasija mahła b zacikavicca takim prajektam», — ličyć kiraŭnik biełaruskaha źniešniepalityčnaha viedamstva.
***
Taksama S. Martynaŭ zajaviŭ, Biełaruś budzie pracavać nad reformami ŭ śfiery pravoŭ čałavieka
Biełaruś budzie pracavać nad reformami ŭ płanie demakratyi, raźvićcia hramadzianskaj supolnaści, svabodny dziejnaści niaŭradavych arhanizacyj, viaršenstva zakona i zachavańnia pravoŭ čałavieka, ale pa tych aśpiektach, jakija sapraŭdy ličyć važnymi dla siabie. Ab hetym zajaviŭ ministr zamiežnych spraŭ Siarhiej Martynaŭ, adkazvajučy na pytańnie infarmahienctva «Agence Europe»
«My abaviazkova budziem pracavać nad peŭnymi pytańniami, jakija, jak my ličym, źjaŭlajucca važnymi. Ale tut ja chacieŭ by, kab my mieli na ŭvazie niekatoryja momanty: pa‑pieršaje, ja nie viedaju ni adnu krainu, dzie niaŭradavyja arhanizacyi nie chacieli b ad urada čahości bolšaha, što ŭ adnolkavaj stupieni spraviadliva ŭ adnosinach i da Biełarusi, i da Vialikabrytanii, Bielhii, ZŠA, — adznačyŭ dypłamat. — Druhi momant, źviarnicie ŭvahu na toje, čaho čakaje ES ad svaich partnioraŭ. Jak my razumiejem, heta pierš za ŭsio stabilnaść i ekanamičny dabrabyt — mienavita na hetych kryteryjach zasnavana inicyjatyva «Uschodniaje partniorstva».
Ministr nahadaŭ, što pa hetych kryteryjach Biełaruś maje lidzirujučyja pazicyi siarod usich šaści «ŭschodnich partnioraŭ» ES. «Biełaruś — vielmi dobry susied, susied numar adzin va «Uschodnim partniorstvie», — zapeŭniŭ Siarhiej Martynaŭ. Pry hetym jon padkreśliŭ, što heta nie aznačaje, što Minsku niama čaho palapšać u svajoj unutranaj palitycy: «My pracujem nad hetym».
«Ale vielmi važna mieć na ŭvazie, što, havoračy ab palapšeńni, my majem na ŭvazie nie palapšeńnie pad naciskam abo strohim nahladam ES, a reformy ŭnutry našaha hramadstva, ad jakich budzie karyść dla nas samich, — zajaviŭ Siarhiej Martynaŭ. — My budziem ažyćciaŭlać reformy ŭ takoj stupieni, u jakoj heta zapatrabavana hramadstvam».
Kiraŭnik biełaruskaha źniešniepalityčnaha viedamstva skazaŭ: «My nie chočam pisać pryhožyja zakony, užyvać hučnyja frazy i prosta pakidać ich na papiery z‑za ich niesumiaščalnaści z realnaściu — što adbyłosia ŭ niekatorych našych susiedziaŭ. My pierakanany, što dla ŭsiaho pavinien pryjści svoj čas»
Kamientary