Viciebskamu pravasłaŭnamu jepiskapu da dušy śviatkavańnie padziełaŭ Rečy Paspalitaj
13 lutaha archijepiskap Viciebski i Aršanski Dzimitryj (Drazdoŭ) pravioŭ słužbu ŭ Maskvie ŭ chramie śviatoj vialikapakutnicy Iryny. U hetym chramie z 2013 hoda dziejničaje pradstaŭnictva Biełaruskaha ekzarchata RPC, a ŭznačalvaje jaho akurat archijepiskap Dzimitryj. Cikavaść dla šyrejšaha hramadstva ŭjaŭlaje, adnak, nie tak sama słužba, jak toje, što było paśla jaje.
Na słužbie siarod inšych prysutničaŭ Siarhiej Baburyn — dastatkova viadomy jašče z 1990-ch hadoŭ palityk, jaki ŭ svoj čas byŭ vice-śpikieram Dziaržaŭnaj dumy. Ciaham usioj svajoj tryccacihadovaj palityčnaj karjery jon prajaŭlaŭ cikavaść da idejaŭ ruskaha nacyjanalizmu: šmatlikija arhanizacyi, jakija jon zasnoŭvaŭ i ŭznačalvaŭ, zaŭsiody mieli nacyjanał-kansiervatyŭnuju ideałohiju. Dy i sam jon nikoli nie hrebavaŭ impierskaj rytorykaj.
Paśla zakančeńnia liturhii archijepiskap Dzimitryj daŭ Baburynu słova, i jon raskazaŭ pra płany na bližejšy čas, jakija padrabiazna pierakazvajucca na sajcie Viciebskaj jeparchii.
U vystupleńni Baburyn adznačyŭ, što ŭ 2022 hodzie spaŭniajecca 250 hadoŭ «uźjadnańniu Biełaj Rusi i Rasii, kali adbyłosia vyzvaleńnie značnaj častki biełarusaŭ ad polskaha pryhniotu». Maŭlaŭ, «dla ruskaha naroda i Rasii padzieja 1772 hoda stała nie mienš losavyznačalnym, čym vyzvaleńnie ŭ 1654 hodzie Małarosii i jaje ŭźjadnańnie ź Vialikarosijaj».
Dla adznačańnia takoha vialikaha jubileju Baburyn prapanavaŭ stvaryć hramadski arhkamitet. Płanujecca z hetaj nahody pravieści ŭ Maskvie i Minsku na hramadskim i dziaržaŭnym uzroŭniach uračystyja mierapryjemstvy, arhanizavać sumiesnyja navukovyja kanfierencyi. A na tych kanfierencyjach abmierkavać u tym liku «stanovišča zachodnieruskich ziamiel u Rečy Paspalitaj i vyzvalenčuju baraćbu suprać polskaha pryhniotu; rolu Ruskaj Pravasłaŭnaj Carkvy ŭ zachavańni ruskaha nacyjanalnaha samaśviadomaści, vyzvalenčaj baraćbie i ŭźjadnańni Biełaj Rusi i Rasii».
Akramia taho, inšyja krynicy paviedamlajuć, što padčas toj sustrečy hučała taksama i prapanova
«źviarnucca da Ministerstva aśviety Rasii ab nieabchodnaści pierahladu interpretacyi padziej 1772, 1793 i 1795 jak «padziełaŭ Rečy Paspalitaj», pakolki ŭ rečaisnaści z boku Rasijskaj impieryi heta byli akty dziaržaŭnaj voli pa vyzvaleńni adzinarodnaj Biełarusi. Vyzvaleńnie svajho nie moža być raździełam čužoha pa aznačeńni. Polšču dzialili niemcy pamiž Aŭstryjaj i Prusijaj, a ruskija vyzvalali adzinaviercaŭ».
Miarkujučy pa tym, što słovy Baburyna nie rastvarylisia ŭ pavietry, a šyroka cytujucca na sajcie Viciebskaj jeparchii, možna mierkavać, što jaje kiraŭnictva z pohladami rasijskaha palityka na padziei našaj historyi całkam salidarnaje.
Zrešty, ničoha dziŭnaha ŭ hetym niama. Jašče ŭ 2016 hodzie, probiačy ahlad biełaruskaha jepiskapatu, «Naša Niva» adznačała pra ŭładyku Dzimitryja, što jaho nazyvajuć «samym prarasijskim siarod biełaruskich jepiskapaŭ», i što pad jahonym kryłom znachodzili prytułak mnohija ludzi, viadomyja antybiełaruskimi i navat čarnasociennymi pohladami.
-
Zabity ŭ Polščy rasijski mastak adnu z karcin pradaŭ za $20 tysiač i zadanaciŭ USU, a apošnija miesiacy atrymlivaŭ pahrozy paśla taho, jak pačaŭ vyśmiejvać Kadyrava
-
Fatohraf z Kalinkavičaŭ zasudziŭ Maskoŭski zaapark, jaki vykarystaŭ biez dazvołu jaho fota norki
-
«Heta jaho paduška biaśpieki». Na trasie pad Minskam zaŭvažyli niezvyčajny sposab pieravozki šyn
Ciapier čytajuć
Łukašenka: Pry ciapierašnim ciačeńni vajny Biełaruś z Rasijaj nie zmahli b abaranić biełaruskaj miažy ad Ukrainy31
Łukašenka: Pry ciapierašnim ciačeńni vajny Biełaruś z Rasijaj nie zmahli b abaranić biełaruskaj miažy ad Ukrainy
«70% mastakoŭ u čornych śpisach». Mastak Siarhiej Hrynievič paśla tryumfu ŭ Vieniecyi raskazaŭ pra hady maŭčańnia i pra toje, na jakim śviecie jon apynuŭsia1515
Kamientary