Pamočnik dziaržsakratara ZŠA pa spravach Jeŭropy i Jeŭrazii Filip Hordan bolš słuchaŭ, čym havaryŭ.
Pamočnik dziaržsakratara ZŠA pa spravach Jeŭropy i Jeŭrazii Filip Hordan bolš słuchaŭ, čym havaryŭ.
Filip Hordan z ranicy ŭ piatnicu pačaŭ svoj vizit z sustrečy z pradstaŭnikami apazicyi.
U amierykanskaje pasolstva byli zaprošanyja eks‑kandydat na pasadu prezidenta na vybarach 2006 h. Alaksandr Kazulin, lider PKB Siarhiej Kalakin, staršynia BSDP Anatol Laŭkovič, staršynia AHP Anatol Labiedźka, namieśnik staršyni Partyi BNF Vincuk Viačorka, namieśnik lidera Ruchu «Za Svabodu» Viktar Karniajenka, sustaršynia BCHD Vital Rymašeŭski, pradstaŭnik pravaabarončaha ruchu «Viasna» Valancin Stefanovič i lider «Maładych demakrataŭ» Michaił Paškievič.
Sustreča doŭžyłasia bolš za paŭtary hadziny. Filip Hordan bolš słuchaŭ, čym havaryŭ. Jaho cikaviła situacyja ŭ Biełarusi, jak jaje aceńvajuć apazicyjaniery. Pamočnik Dziaržsakratara adznačyŭ, što hetuju ranišniuju sustreču jon pravioŭ, kab być bolš padrychtavanym dla sustrečy z pradstaŭnikami ŭładaŭ, paviedamiŭ Michaił Paškievič.
Hordan taksama zaznačyŭ, što Amieryka nie pojdzie na admienu ekanamičnych i vizavych sankcyj suprać Biełarusi ŭ abmien na pavieličeńnie štatu pasolstva ŭ Minsku.
U prahramie adnadzionnaha vizitu byli taksama sustrečy ŭ Administracyi prezidenta i Ministerstvie zamiežnych spraŭ.
U Administracyi Hordana pryniaŭ kiraŭnik hetaha orhana Uładzimir Makiej. Mienavita jon ličycca architektaram siońniašniaha zamiežnapalityčnaha kursu łukašenkaŭcaŭ.
«Adbyŭsia hruntoŭny abmien dumkami pa pytańniach šmatbakovaha supracoŭnictva, uzajemadziejańnia ŭ śfiery mižnarodnaj biaśpieki i razzbrajeńnia. Baki damovilisia padtrymlivać rehularnyja kantakty», — paviedamlaje BIEŁTA pra sustreču Hordana z Makiejem.
Paśla sustrečy ŭ MZS nie było tradycyjnaha vychadu da presy, i vynikaŭ pieramovaŭ z aficyjnymi strukturami pakul nie viedajem. Što majecca na ŭvazie pad «rehularnymi kantaktami», stanie jasna paźniej. Adnak u apošni čas u dvuchbakovych adnosinach zaŭvažna źnikła raniejšaje napiaćcio.
U Minsk Filip Hordan prybyŭ ź Vilni. Padčas vizitu ŭ Litvu 12—13 žniŭnia jon abmierkavaŭ z kiraŭnictvam hetaj krainy šerah aktualnych mižnarodnych prablem, u tym liku stratehičnuju kancepcyju NATO, upłyŭ suśvietnaha ekanamičnaha kryzisu na krainy Uschodniaj Jeŭropy, prahramu ES «Uschodniaje partniorstva», situacyju ŭ Hruzii, Ukrainie i Biełarusi.
Jak zajaviŭ na sustrečy z pamočnikam dziaržsakratara ZŠA ministr zamiežnych spraŭ Litvy Vihaŭdas Ušackas, «padtrymka ZŠA ź`iaŭlajecca važnaj dla ažyćciaŭleńnia palityki Uschodniaha partniorstva». Ministr taksama ŭkazaŭ na nieabchodnaść umacavańnia supracoŭnictva z uschodnimi susiedziami. «Asabliva važna ŭklučyć u hetyja pracesy našaha najbližejšaha susieda — Biełaruś», — padkreśliŭ Ušackas.
Kamientujučy adnosiny ZŠA i Biełarusi, Hordan zajaviŭ:
Złučanyja Štaty admieniać sankcyi ŭ dačynieńni da biełaruskich pradpryjemstvaŭ paśla taho, jak u krainie ź`iavicca bolš svabody dla aktyvistaŭ apazicyi, ŚMI i NDA.
Amierykanski čynoŭnik adznačyŭ kroki nasustrač z boku biełaruskich uład, u pryvatnaści vyzvaleńnie palitźniavolenych. Mienavita takija kroki, padkreśliŭ Hordan, «zrabili mahčymym» jaho vizit u Biełaruś. «Mahčyma, biełaruskija ŭłady hatovy iści nasustrač, ale pavinny prykłaści bolš namahańniaŭ», — cytuje Hordana ahienctva Rejter.
Pakul ža, adznačyŭ pamočnik dziaržsakratara, u Biełarusi praciahvajucca aryšty pavodle palityčnych matyvaŭ. Vašynhton hatovy adpravić u Minsk pasła (zaraz amierykanskaje pasolstva ŭ Biełarusi ŭznačalvaje časovy pavierany. — BiełaPAN.), ale «miač — na baku pola biełaruskich uład», padkreśliŭ Hordan.
Pry hetym jon daŭ zrazumieć, što padčas jaho vizitu ŭ Minsk składana čakać kankretnych rašeńniaŭ pytańniaŭ ab pavyšeńni ŭzroŭniu pasolstva i ab admienie sankcyj.
Kamientary