Z asudžeńniem vajny i ŭ padtrymku Ukrainy vystupiŭ Viarchoŭny łama Kałmykii
Viarchoŭny łama Kałmykii Teło Tułku Rynpoče (Erdni Ambadykaŭ) zajaviŭ, što praŭda ŭ vajnie znachodzicca na baku Ukrainy, bo jana abaraniaje svaju ziamlu. Heta pieršaje publičnaje vystupleńnie takoha ŭzroŭniu lidara tradycyjnaj dla Rasii relihijnaj kanfiesii, jakoje adnaznačna asudziła rasijskuju vajennuju ahresiju.
«Dumaju, što heta niapravilna, hetaja vajna nie patrebnaja. Tym bolš my žyviem u XXI stahodździ — usie chočuć žyć mirna, spakojna, kožnaja kraina choča raźvivacca…
Dumaju, što ŭkrainski bok, viadoma, sapraŭdy maje racyju — jon abaraniaje svaju krainu, svaju ziamlu, svaju praŭdu, svaju Kanstytucyju, svoj narod. Vielmi składana skazać i pryniać, što Rasija maje racyju. Heta vielmi ciažka skazać, hetaha ja nie mahu», — zajaviŭ Viarchoŭny łama Kałmykii.
Teło Tułku Rynpoče padkreśliŭ, što da hetaha momantu jon nie kamientavaŭ vajnu va Ukrainie, bo «nie chacieŭ psavać adnosiny pamiž uładaj i našymi budystami». Pry hetym jon ličyć, što lidary budysckich hramad Rasii, vystupajučy ŭ padtrymku vajennaj ahresii, naŭrad ci tak dumajuć ščyra, kali źjaŭlajucca sapraŭdnymi budystami.
Ciapier Teło Tułku Rynpoče znachodzicca ŭ Manholii, dzie pravodzić sustrečy z žycharami Kałmykii, jakija emihravali z Rasii, a taksama dapamahaje im u arhanizacyi raźmiaščeńnia.
U siaredzinie červienia Teło Tułku Rynpoče ŭ zvarocie z nahody Dnia naradžeńnia Budy ŭžo vystupaŭ z antyvajennaj zajavaj, ale biez kankretnaj pryviazki da ŭkrainskich padziej.
49-hadovy Erdni Ambadykaŭ (Teło Tułku Rynpoče) naradziŭsia ŭ ZŠA ŭ siamji kałmyckich emihrantaŭ, z rańniaha dziacinstva vychoŭvaŭsia ŭ tybieckim manastyry ŭ Indyi, a duchoŭnym lidaram kałmykaŭ staŭ u 1992 hodzie, usiaho ŭ 20 hadoŭ. Akramia jaho, siarod kałmykaŭ tady ŭvohule nie było ludziej z adpaviednaj budysckaj adukacyjaj.
Akramia kałmykaŭ, u Rasii žyvuć jašče dva karennyja narody, vierniki ź liku jakich u asnoŭnym vyznajuć budyzm — buraty i tuvincy. Kałmyki — adziny budyjski narod, radzima jakoha znachodzicca na terytoryi hieahrafičnaj Jeŭropy.
Raniej pradstaŭniki ŭsich tradycyjnych kanfiesij Rasii — pravasłaŭja, isłamu, iŭdaizmu i budyzmu — padtrymali vajennuju ahresiju va Ukrainie i zaklikali «malitoŭna padtrymlivać vajaroŭ i ŭsich ludziej dobraj voli, jakija zmahajucca suprać nacysckich, nieanacysckich, terarystyčnych i relihijna-ekstremisckich sił», majučy na ŭvazie Uzbrojenyja siły Ukrainy i dobraachvotnickija farmavańni.
U hadavinu śmierci Žanny Fryskie Dźmitryj Šepieleŭ raspavioŭ, čamu nie dazvalaje synu bačycca ź jaje svajakami16
Kamientary