Apublikavany prajekt zakona ab amnistyi. Palityčnym ničoha nie śviecić
Narešcie źjaviŭsia doŭhačakany prajekt zakona ab amnistyi, prymierkavanaj da «dnia narodnaha adzinstva» 17 vieraśnia. Ad taho «dnia» prajšoŭ užo amal miesiac i niejki čas byli navat padazreńni, što pra hetuju abiacanuju amnistyju ŭvohule zabylisia. Ale jana ŭsio ž budzie, choć navat prabiežny pohlad na prajekt zakona pakazvaje, što palitviaźniaŭ amnistyja kali i zakranie, to zusim niaznačna.
Jak paviedamiŭ «Našaj Nivie» pravaabaronca, dla taho, kab u hetym pierakanacca, dastatkova prahladzieć tolki artykuł 10, u jakim pieraličvajucca artykuły, asudžanyja pa jakich pad amnistyju nie patraplajuć.
Tam prysutničajuć usie papularnyja artykuły, pa jakich u Biełarusi sadžajuć za palityku:
130 (raspalvańnie varožaści), 293 (masavyja biesparadki), 342 (dziejańni, jakija hruba parušajuć hramadski paradak), 361-1 (udzieł u ekstremisckim farmavańni), 368 (abraza Łukašenki), 369 (abraza pradstaŭnika ŭłady).
Taksama tam ža admysłova ahavorana, što nie buduć vyzvalacca asoby, jakija majuć dačynieńnie da «ekstremisckaj dziejnaści» i tyja, chto «złosna parušaje ŭstalavany paradak padčas adbyvańnia pakarańnia ci inšych mieraŭ kryminalnaj adkaznaści».
Niezdarma palitviaźniaŭ pastajanna na absalutna nadumanych padstavach prahaniajuć praz ŠIZA i karcary, dajuć im spahnańni i zaličvajuć u «ekstremisckija» i navat «terarystyčnyja» śpisy.
Zrešty, pavodle art. 21, «rašeńnie ab prymianieńni ci nieprymianieńni hetaha zakona prymajecca ŭ dačynieńni da kožnaj asoby indyvidualna», tamu, mahčyma, indyvidualna praz hetaje sita niechta i pratočycca.
Ale ahulny sens zakona — palitviaźniam naŭrad ci davodzicca na niešta raźličvać, pad amnistyju patrapiać tolki čystyja kryminalniki.
Kamientary