«Padkažycie svaim prydurkam, treba pisać adrazu Bajdenu». Žychary Kastramy prosiać Łukašenku viarnuć u ich horad tralejbusy
Žychary Kastramy zapisali videazvarot da Alaksandra Łukašenki. Jany prosiać ułady Biełarusi «ŭ samyja karotkija terminy ŭ metach padtrymki i ŭmacavańnia Sajuznaj dziaržavy pieradać ź Minska niekalki dziasiatkaŭ tralejbusaŭ u Kastramu».
Kastramičy na videa prosiać Łukašenku viarnuć tralejbusny ruch u ich horad, bo Kastrama pakutuje ad vychłapaŭ «kamiercyjnych aŭtobusaŭ-maršrutak».
Aŭtary zvarotu raspaviadajuć, što dziakujučy Łukašenku ŭ Biełarusi «zachavany i raźvivajucca pramysłovaść, mašynabudavańnie i infrastruktura tralejbusnaha ruchu», što Minsk zjaŭlajecca «samym tralejbusnym horadam u śviecie», a ŭ Biełarusi pracujuć «najbujniejšyja tralejbusnyja zavody, jakija zabiaśpiečvajuć tralejbusami harady ŭsioj našaj Sajuznaj dziaržavy».
U Kastramie z 1 lipienia, havorać aŭtary zvarotu, «čynoŭnikami-karupcyjanierami byŭ zakryty tralejbusny ruch, kab naviazać ludziam kamiercyjnyja aŭtobusy-maršrutki, što ŭžo pryviało da katastrafičnych nastupstvaŭ, da sacyjalnaha biedstva ŭ Kastramie, da atručeńnia žycharoŭ Kastramy vychłapnymi hazami».
Žychary horada nahadvajuć Łukašenku pra Sajuznuju dziaržavu i prosiać «akazać dapamohu ŭ adnaŭleńni ruchu tralejbusaŭ u Kastramie ŭ najkaraciejšyja terminy».
«U metach padtrymki i ŭmacavańnia Sajuznaj dziaržavy prosim pieradać ź Minska niekalki dziasiatkaŭ tralejbusaŭ u Kastramu, u tym liku možna pieradać tralejbusy, jakija ŭžo ekspłuatavalisia ŭ Minsku», — skazali aŭtary zvarotu.
Jak paviedamlaje «Lentač», u Biełarusi hety zvarot pačuli i paprasili miascovyja ŭłady razabracca ŭ situacyi.
Adnak list ź Biełarusi trapiŭ da vice-hubiernatara Juryja Makava, jaki kuryravaŭ «transpartnuju reformu». Jon pierasłaŭ papieru pieršamu sakrataru Kastramskoha abkama KPRF Valeryju Ižyckamu i paprasiŭ jaho skazać «svaim prydurkam», kab pisali «adrazu Bajdenu».
Va ŭradzie rehijona kamientavać słovy vice-hubiernatara admovilisia.
Kamientary