10 samych papularnych biełaruskich jutub-kanałaŭ. Pra niekatoryja vy dakładna nie čuli
Telehram-kanał «Youtube Biełarusi» skłaŭ top biełaruskich kanałaŭ 2023 hoda pa prahladach. U pieršaj dziasiatcy jość tyja, pra jakija vy mahli nie čuć — raskazvajem pra ich padrabiaźniej.
Usie 50 samych papularnych kanałaŭ, jakija ŭklučyli ŭ top, razam nabrali ŭ 2023-m 2,5 miljarda prahladaŭ. Siarod lidaraŭ jość kanały roznych žanraŭ: heta i miedyja (naprykład, NEXTA Live, BIEŁSAT NEWS, Onliner), i zabaŭlalnyja («Ovoŝievoz», «Słava Komissarienko», «Łonhplej»), kanały ź dziciačym i fitnes-kantentam, muzyka, videa navukovaha źmiestu i nie tolki.
Aŭtary śpisu taksama nazyvajuć samyja chutkarosłyja kanały rejtynhu. Siarod ich, darečy, kanał Naša Niva NEWS — rost u 5,7 raza.
A top-10 rejtynhu vyhladaje tak:
Raskazvajem pra kanały, jakija mohuć być vam nieznajomymi.
ZARAZ (900 miljonaŭ prahladaŭ za hod)
Ź vialikim adryvam u rejtynhu lidziruje kanał «ZARAZ» (1,69 miljona padpisantaŭ) ad błohiera Mikity Kavaleŭskaha. Chłopiec robić paznavalny kantent: videa z faktami pra roznyja krainy, viadomych asobaŭ i fienomieny.
Niekalki miesiacaŭ tamu Mikita pasprabavaŭ vyžyvańnie ŭ Jeŭrasajuzie na 1 cent u sutki — nasamreč chłopiec mieŭ u siabie značna bolšyja srodki, jakija zdabyvaŭ roznym čynam padčas čelendža. A ŭ kancy śniežnia ŭ Mikity vyjšła videa pad nazvaj «Ja źjechaŭ u samy svabodny horad Rasii». Takim akazaŭsia horad Svabodny ŭ Amurskaj vobłaści, dzie Mikita dakranuŭsia da kłasičnaj rasijskaj hłybinki — 30 hradusaŭ marozu, savieckaja architektura i niepaŭtorny rehijanalny servis.
perpetuumworld (270 miljonaŭ prahladaŭ)
Na druhoj pazicyi ŭ śpisie raźmiaściŭsia kanał z ahladami hulniaŭ — u perpetuumworld 3,64 miljona padpisčykaŭ. Vyhladaje, što ŭ Alaksandra, viadučaha na perpetuumworld, niama pieravah u žanrach hulniaŭ — jon biarecca za ŭsio: vyžyvaje ŭ śviecie zombi z Arizona Sunshine 2, hraje ŭ hastraenterołaha ŭ Revenge Of The Colon i zachoplivaje staražytnuju Jeŭropu ŭ Shieldwall.
Videa na kanale vychodziać nie radziej za tydzień-dva, a to i kožny dzień.
Dikij Łoś (129,6 miljona prahladaŭ)
Čaćviortaje miesca ŭ topie zajmaje kanał babrujskaha ratavalnika. Jaŭhien Łoś maje 20-hadovy staž u treniroŭkach (addaje pieravahu varkautu i kalistenicy), dva rekordy, zarehistravanyja ŭ Knizie rekordaŭ Hinesa, i bahata čempijonstvaŭ krainy pa vuličnym varkaucie.
Svoj kanał Jaŭhien zasnavaŭ jašče 13 hadoŭ tamu. Na hetaj staroncy jon vykładaje videa z treniroŭkami dla roznych zon ci na ŭsio cieła, a raniej jašče i rabiŭ čelendžy — naprykład, z padciahvańniami ci pracaj na turniku. A niadaŭna pakazaŭ, jak pažarnyja adciskajucca na brusach — 132 tysiačy prahladaŭ!
Anton Malar (75,8 miljona prahladaŭ)
Piataje miesca ŭ rejtynhu zajmaje kanał pra mašyny z 725 tysiačami padpisčykaŭ. Zbolšaha błohier Anton raskazvaje pra toje, jak jon farbuje i pieravarvaje mašyny, zakranaje i inšyja aŭtamabilnyja temy: naprykład, jak vydalić iržu ŭnizie dźviarej, ci pakazvaje praces adnaŭleńnia starych mašyn.
Roliki z restaŭracyjaj aŭtamabilaŭ — adny z samych papularnych na kanale. Adznačym, naprykład, adnaŭleńnie ŭsiedarožnika 1982 hoda, jaki niechta vykinuŭ (5,3 miljona prahladaŭ) ci staroha BMW z 1990-ch (17 miljonaŭ prahladaŭ).
NEWTONLABS (56,5 miljona prahladaŭ)
Na vośmaj pazicyi ŭ topie raźmiaściŭsia kanał pra hadžety — praŭda, aŭtar addaje pieravahu tavaram ad Apple. Jość videa i dla niajabłyčnikaŭ — naprykład, rolik «100 faktaŭ ab Apple» na 120 tysiač prahladaŭ ci videa pra top-20 najvialikšych technałahičnych pravałaŭ, jakija ŭvajšli ŭ historyju (663 tysiačy prahladaŭ).
Chacia i tym, chto ŭžo maje hadžety ad Apple, tut dakładna budzie na što pahladzieć. Naprykład, prezientacyi roznych madelaŭ ajfonaŭ, paraŭnańnie kitajskich i aryhinalnych dapaŭnieńniaŭ dla hadžetaŭ, čachłoŭ i kabielaŭ.
Całkam top-50 jutub-kanałaŭ tut.
«Naša Niva» — bastyjon biełaruščyny
PADTRYMAĆČytajcie taksama:
Kiraŭnik Apple raspavioŭ, ludziej ź jakimi jakaściami jon z radaściu voźmie na pracu
Apple vypuskaje navinku dla bahatych — akulary źmiašanaj realnaści Vision Pro. Jak jany pracujuć?
Kamientary