U pačatku 1990-ch hety brend staŭ adnym ź simvałaŭ prychodu ŭ Biełaruś rynkavych adnosin i adnoj z krynic pieršapačatkovaha kapitału.
Pavodle danych, raźmieščanych na sajcie Minharvykankama, rašeńnie ab likvidacyi pradstaŭnictva pryniali ŭłaśniki kampanii, piša vydańnie «Biełarusy i rynak».
Pradstaŭnictva Xerox było zarehistravana brytanskim ofisam amierykanskaj karparacyi ŭ Minsku ŭ 2008 hodzie. Ale sam brend prysutničaŭ na rynku Biełarusi z pačatku 1990-ch.
U tym pieryjadzie pradukcyja Xerox Corporation, suśvietnaha lidara ŭ vytvorčaści masavych kapijavalnych aparataŭ, była adnym z samych viadomych i zapatrabavanych u biełarusaŭ tavaraŭ zachodniaha śvietu.
Na jaje imparcie, prodažach i servisie zarabili pieršapačatkovyja hrošy mnohija viadomyja biznesoŭcy Biełarusi. Adnym ź pieršych «ksieraksy» ŭ krainu ŭ 1990-ja pačała zavozić firma «Ideja», prezidentam i saŭładalnikam jakoj byŭ viadomy biznesoviec Leanid Šaton. Častku srodkaŭ, vyručanych ad prodažu deficytnaj arhtechniki, Šaton paźniej ukłaŭ u stvareńnie Biełaruskaj fondavaj biržy i Biełaruskaha biržavoha banka.
Da siaredziny 1990-ch, paśla zapaŭnieńnia nišy, prodažy «ksieraksaŭ» vyjšli na płato. Da hetaha hoda jany i servis pastaŭlenych aparataŭ padtrymlivalisia dziejučymi ŭ Biełarusi pradstaŭnictvami karparacyi.
Kamientary