Litva pieradaść Ukrainie kompleksy SPA małoj dalokaści. U płanach taksama — pieradać 5000 dronaŭ da zimy
Premjer-ministr Litvy Inhryda Šymanicie anansavała novy pakiet vajskovaj dapamohi z kompleksami SPA i inšym abstalavańniem, jaki pavinien pastupić va Ukrainu da pačatku vieraśnia.
Pra heta jana skazała na pres-kanfierencyi ŭ Kijevie z prezidentami Ukrainy i Polščy Uładzimiram Zialenskim i Andžejem Dudam, paviedamlaje «Jeŭrapiejskaja praŭda».
Sa słoŭ Šymanite, pazicyja Litvy ŭ vajnie vyraznaja i prostaja: Ukraina pavinna vyjhrać, Rasija pavinna prajhrać.
«Na našaj sustrečy siońnia ja prainfarmavała prezidenta Zialenskaha, što najnoŭšy pakiet vajskovaj dapamohi ad Litvy pastupić va Ukrainu da pačatku vieraśnia.
Jon budzie ŭklučać kompleksy SPA małoj dalokaści, rakiety, supraćdronnaje i inšaje abstalavańnie, zbroju i bojeprypasy», — udakładniła premjer Litvy.
Akramia taho, adznačyła jana, Litva raźmiaściła 35 miljonaŭ jeŭra na zakupku radaraŭ i abstalavańnia dla raźminiravańnia dla Ukrainy.
«Da kanca vosieni my spadziajemsia, što zmožam taksama pieradać bolš za 5 tysiač dronaŭ litoŭskaj vytvorčaści», — skazała taksama Šymanicie.
Raniej u žniŭni pad Kijevam adbylisia paŭtornyja vyprabavańni bajavych bieśpiłotnikaŭ litoŭskaj vytvorčaści ŭ pryfrantavych umovach.
Hetyja vyprabavańni byli arhanizavany dla taho, kab Ukraina mahła vybrać pradukcyju, jakaja lepš za ŭsio adpaviadaje patrebam ukrainskich vajskoŭcaŭ.
Piać litoŭskich vytvorcaŭ bajavych bieśpiłotnikaŭ paśpiachova zaviaršyli vyprabavańni i buduć zaprošany da pradstaŭleńnia kančatkovych prapanoŭ i zaklučeńnia kantraktaŭ na vytvorčaść bieśpiłotnikaŭ.
Płanujecca pieradać Ukrainie bieśpiłotniki litoŭskich vytvorcaŭ na sumu 5 młn jeŭra, a taksama zakupić takuju ž techniku dla Uzbrojenych sił Litvy.
Kamientary