ZŠA abviaścili vielizarnuju ŭznaharodu za infarmacyju pra hramadzianina Biełarusi. Ale jon užo ŭ biełaruskaj turmie
Sprava Uładzimira Kadaryi — jaki ŭciok ź Biełarusi va Ukrainu, potym byŭ zatrymany ŭ Kyrhyzstanie, zajaŭlaŭ pra palityčny pieraśled z boku režymu Łukašenki, ale ŭsio roŭna byŭ ekstradziravany nazad na radzimu — abrastaje ŭsio bolšymi dzivosami.
Dziarždep ZŠA abjaviŭ pra ŭznaharodu pamieram $2,5 miljona (amal 8 miljonaŭ rubloŭ) za infarmacyju, jakaja dazvolić zatrymać i asudzić hramadzianina Biełarusi Uładzimira Kadaryju, jaki «datyčny da surjoznych kibierzłačynstvaŭ, z-za čaho paciarpieli miljony ludziej».
Pavodle zajavy viedamstva, Kadaryja abvinavačvajecca ŭ tym, što ŭ pieryjad z kastryčnika 2013 hoda pa sakavik 2022 hoda ŭ składzie złačynnaj arhanizacyi raspaŭsiudžvaŭ na miljony pryład i kampjutaraŭ škodnasny soft Angler (adna z samych viadomych fišynhavych prahram-vymahalnic) i inšyja škodnasnyja prahramy, źviazanyja z anłajn-machlarstvam.
Hetaje i mnohija inšyja abvinavačańni byli aficyjna vystaŭlenyja Uładzimiru Kadaryi na zavočnym sudzie 14 červienia 2023 hoda ŭ akruzie Ńju-Džersi, adznačaje Dziarždep. Viedamstva prapanuje kožnamu, u kaho jość infarmacyja pra Kadaryju, źviazacca z Sakretnaj słužbaj ZŠA pa elektronnaj pošcie (jana paznačanaja ŭ paviedamleńni Dziarždepa) ci naviedać amierykanskija pasolstvy i konsulstvy.
Adnak doŭha šukać Kadaryju nie pryjdziecca. Sapraŭdaje imia mužčyny — Andrej Kavaloŭ, i ŭ 2022 hodzie pa zapycie biełaruskich siłavikoŭ jaho ŭžo zatrymlivali ŭ Kyrhyzstanie, adkul praz hod ekstradziravali ŭ Biełaruś.
Kavaloŭ (Kadaryja) atrymaŭ va Ukrainie status palityčnaha ŭciekača i prasiŭ ułady Kyrhyzstana nie viartać jaho na radzimu, nibyta praz palityčny pieraśled. Paśla pieradačy mužčyny ŭ Biełaruś dziaržprapahanda spravazdačyłasia pra jahonaje zatrymańnie za kibierzłačynstvy.
«Ja nikoli nie ŭdzielničaŭ ni ŭ jakich palityčnych ruchach, ničoha nie administravaŭ. Z palitykaj nikoli nie byŭ źviazany. Nie viedaju, chto i dla čaho takija artykuły raźmiaściŭ. Nie maju nijakaha dačynieńnia da hetaha. Vy sami viedajecie, čamu ja adsiul uciok i jaki artykuł mnie inkryminujuć», — zajaviŭ Andrej Kavaloŭ (Kadaryja) padčas dopytu z boku biełaruskich siłavikoŭ.
Čamu Dziarždep ZŠA, vierahodna, viedajučy pra zatrymańnie Kadaryi ŭ Biełarusi, publična abviaščaje vialikuju ŭznaharodu za infarmacyju pra mužčynu, zastajecca niajasnym.
Nahadajem, što niadaŭna śpiecsłužby ZŠA, Ispanii, Vialikabrytanii i Polščy praviali hučnuju sumiesnuju apieracyju pa zatrymańni jašče adnaho hramadzianina Biełarusi — Maksima Silnikava, jaki źjaŭlajecca adnym z samych niebiaśpiečnych kibierzłačyncaŭ u śviecie. Pavodle śpiecsłužbaŭ, jon pracavaŭ razam z Andrejem Kavalovym (Kadaryjaj) u adnoj kamandzie.
«Naša Niva» tady daviedałasia padrabiaznaści pra asobu Silnikava.
Ciapier čytajuć
Łukašenka: Pry ciapierašnim ciačeńni vajny Biełaruś z Rasijaj nie zmahli b abaranić biełaruskaj miažy ad Ukrainy32
Kamientary