Praź niekalki dzion paśla taho, jak hienprakurory Biełarusi i Armienii abmierkavali pytańnie ab ekstradycyi hramadzian Biełarusi, jakija znachodziacca ŭ vyšuku, Armienija moža pieradać siłavikam u Minsku adnaho z abvinavačanych — 36-hadovaha Uładzimira Bałandzina, piša «Radyjo Svaboda».
Pra mahčymuju ekstradycyju hramadzianina Biełarusi Uładzimira Bałandzina paviedamiła jahonaja advakatka Ani Čacinian.
«Znachodziačysia ŭ pienitencyjarnaj ustanovie Vanadzora, jon daviedaŭsia, što ŭ najbližejšy čas jaho pavinny ekstradavać, dla čaho jaho pieraviali ŭ adnu ź pienitencyjarnych ustanoŭ u Jerevanie», — skazała advakatka.
Hramadzianina Biełarusi Uładzimira Bałandzina zatrymali na hruzinska-armianskaj miažy, u kantrolna-prapusknym punkcie Bahratašen. Jon znachodzicca ŭ turmie ŭžo 7 miesiacaŭ.
Pavodle źviestak aficyjnaha Minska, na radzimie Bałandzina nibyta abvinavačvajuć u rastracie. Miž tym, advakaty biełarusa śćviardžajuć, što mebielščyka Bałandzina pryciahnuli da adkaznaści za ŭdzieł u pratestach 2020 hoda suprać vynikaŭ prezidenckich vybaraŭ u Biełarusi.
«Jaho stali pieraśledavać paśla taho, jak jon — jak i tysiačy hramadzian — vyrašyŭ udzielničać u demanstracyjach, schodach i maršach u krainie», — skazała Ani Čacinian.
Hienieralnaja prakuratura Armienii pryniała rašeńnie vydać Uładzimira Bałandzina 31 maja. U armianskaj prakuratury paviedamili, što Hienprakuratura Biełarusi dała harantyi abarony jaho pravoŭ i svabodaŭ, adnak biełaruskija pravaabaroncy nie sumniavajucca, što ŭ vypadku ekstradycyi pravy Bałandzina ŭ Biełarusi buduć parušanyja.
Rašeńnie armianskaj prakuratury, jakoje dazvoliła ekstradycyju, asprečyli ŭ armianskich sudach, ale biespaśpiachova.
«Respublika Armienija, budučy pravavoj, demakratyčnaj dziaržavaj, nie pavinna vykonvać niezakonnyja patrabavańni dyktataraŭ ci niedemakratyčnych krain, krain, dzie Kryminalnym kodeksam da hetaha času praduhledžana śmiarotnaje pakarańnie jak srodak pakarańnia, dzie isnuje haniebnaja situacyja masavych parušeńniaŭ pravoŭ», — zajaviła advakatka Bałandzina.
Hienprakuratura Armienii admoviłasia kamientavać armianskaj słužbie «Radyjo Svaboda» rašeńnie ab ekstradycyi Uładzimira Bałandzina, a ŭ vanadzorskim ofisie Chielsinkskaj hramadzianskaj asamblei, jaki ŭziaŭ na siabie abaronu biełarusa, śćviardžajuć, što rašeńnie ab ekstradycyi niezakonnaje. Na dumku pravaabarončaj arhanizacyi, heta vynik palityčnych damoŭlenaściaŭ pamiž Biełaruśsiu i Armienijaj.
«Słužba mihracyi i hramadzianstva MUS Armienii praviała paralelnaje raźbiralnictva z prośbaj Uładzimira Bałandzina ab nadańni prytułku», — skazała Čacinian.
Advakatka śćviardžaje, što ekstradycyju Bałandzina mohuć admianić, kali Słužba mihracyi i hramadzianstva zadavolić jaho chadajnictva ab nadańni prytułku. Pa słovach Čacinian, ekstradycyju prypyniać da razhladu zajavy.
Armianskaja słužba «Radyjo Svaboda» nakiravała zapyt u Mihracyjnuju słužbu ab chodzie razhladu zajavy Bałandzina, adnak viedamstva nie dało nijakaj infarmacyi, spasyłajučysia na zakon ab abaronie piersanalnych źviestak.
Pavodle źviestak vanadzorskaha ofisa Chielsinkskaj hramadzianskaj asamblei, ź Minska pastupali patrabavańni ab ekstradycyi jašče sama mienš dvuch hramadzian Biełarusi, adnak armianski bok ich nie zadavoliŭ. Hetyja biełarusy atrymali status uciekačoŭ u Armienii. Biełaruś abviaściła ich u vyšuk nibyta «za ŭchileńnie ad vajskovaj słužby», ale pravaabaroncy śćviardžajuć, što kryminalnyja spravy suprać ich zaviali za ŭdzieł u mitynhach suprać Łukašenki.
Raniej paviedamlałasia, što 3 kastryčnika na sustrečy z armianskaj kalehaj Hannaj Vardapiecian hienieralny prakuror Biełarusi Andrej Švied abmierkavaŭ pytańnie vydačy biełarusaŭ, abvinavačanych i asudžanych pa kryminalnych spravach.
Kamientary