Niekalki dzion tamu ŭ centry Minska zaŭvažyli pacukoŭ. Ciapier im šukajuć dom, bo mohuć zahinuć
Niekalki dzion tamu ŭ tyktoku źjaviŭsia rolik, źniaty na vulicy Kulman u Minsku: u kadry niekalki pacukoŭ roznaha koleru i ŭzrostu vybiahajuć z-pad kusta i navat nie bajacca ludziej.
«Jak vas tut šmat!» — usklikaje aŭtar rolika. Dziaŭčyna vykazała zdahadku, što hryzunoŭ vykinuli — z vyhladu pacuki chutčej nahadali dekaratyŭnych. Častka kamientataraŭ pahadzilisia i navat vykazała zdahadku, što heta moža być za paroda. Paśla ahałoski ratavać hryzunoŭ padachvocilisia vałanciory: budučyja chałady pacuki mohuć nie pieražyć. Pakul udałosia złavić siemiarych, i ciapier im šukajuć novy dom, piša Onliner.by.
Vybrosili domašnich krys na Kulman(
Rolik byŭ apublikavany piać dzion tamu i śpiarša mnohija vyrašyli, što pacuki žyvuć u rajonie «Kamaroŭki». Paźniej hetuju infarmacyju administracyja rynku źniapraŭdziła. Akazałasia, što videa źniataje pobač z krytym parkinham, na skryžavańni vulic Kulman i Kujbyšava.
Žurnalisty taksama źviarnulisia da śpiecyjalistaŭ, jakija paćvierdzili zdahadki kamientataraŭ: pacuki vidavočna chatnija. Na heta pakazvaje afarboŭka i navat pavodziny: z-za pačućcia niebiaśpieki dzikija hryzuny nie pojduć na kantakt z čałaviekam.
— Adnaznačna, niejki biessaromny čałaviek vykinuŭ chatnich hadavancaŭ. I vidavočna nie paru dzion tamu, kali ŭličyć, što my bačym nie tolki darosłych asobin, ale i małych, jakija vyvielisia, chutčej za ŭsio, u nary, jakuju žyvioły zrabili ŭ karaniach dreŭ. Marazy jany pieranosiać drenna, i kali ich nie adłavić, to, chutčej za ŭsio, žyvioły zahinuć, — adznačyła ekśpiert.
Što z pacukami ciapier?
Paśla taho jak rolik zavirusiŭsia (ciapier u videa bolš za 250 tysiač prahladaŭ) na historyju źviarnuli ŭvahu vałanciory. Niekalkich hryzunoŭ užo ŭdałosia vyratavać. Maryna raspaviała Onliner, što ciapier hryzunami zajmajucca pradstaŭniki vałanciorskaha atrada «RATuj!».
— My znajšli miesca ź videa i vyjavili tam pacukoŭ, jakija biehajuć. Ludzi ich aktyŭna padkormlivajuć, tamu jany sytyja i łoviacca nie vielmi chutka. Łovim pacukoŭ z vychodnych: u pieršy dzień złavili chłopčyka-padletka, potym małuju, dalej jašče dvuch dziaŭčynak-padletkaŭ i jašče troch małych. Usiaho na dadzieny momant udałosia złavić siem pacukoŭ. Usie zdarovieńkija i čystyja — jany 100% dekaratyŭnyja. Dzikich my tam nie bačyli, i dzieci nie paŭkroŭki.
Miarkujučy pa ŭzroście, pacukoŭ vykinuli prykładna 2-3 miesiacy tamu. Starejšyja padletki dvuchmiesiačnyja, małyja zusim maleńkija, tolki pačali sami vychodzić z nary. Chutčej za ŭsio, naradzilisia ad adnoj i toj ža darosłaj pacučychi.
Pa słovach Maryny, siem vyratavanych hryzunoŭ — daloka nie ŭsie, chto apynuŭsia na vulicy. Tamu vałanciory płanujuć praciahvać łavić pacukoŭ — kali hetaha nie zrabić, to žyvioły mohuć zahinuć praz choład. Tamu asobna vykazvajuć padziaku administracyi parkinha, jakaja pajšła nasustrač.
— Dakładna ŭpeŭnieny: zastałosia dva čornyja padletki i dvoje ci troje małych. Darosłych pacukoŭ my nie bačyli ni razu. Spadziajemsia, što jany jašče žyvyja i prosta aściarožničajuć. Ale da nas vychodzili tolki dzieci.
Pakul vyratavanyja pacuki žyvuć u vałancioraŭ. Maryna raspaviadaje, što hryzuny trochi napałochanyja, ale chutka adaptujucca da čałavieka i lohka iduć na ruki. Zaraz vyratavanym žyviołam šukajuć dom — źviazacca z vałanciorami možna praz Instagram abo napisaŭšy aŭtaru materyjału ŭ Telegram.
Kamientary