Siarod zatrymanych hruzinskaj palicyjaj u Tbilisi i Batumi akazalisia žurnalisty i apazicyjnyja palityki.
Pra heta paviedamlaje vydańnie Reform.news
«Kala budynka Kanstytucyjnaha suda byŭ zatrymany apieratar i fatohraf vydańnia «Batumelebi» Huram Murvanidze. Jaho zatrymali padčas aśviatleńnia akcyi i zdymki videamateryjału», — paviedamlaje Tbilisi life.
Pavodle vydańnia, siarod zatrymanych: deputat Viarchoŭnaha savieta Adžaryi i staršynia batumskaj arhanizacyi «Adziny nacyjanalny ruch» Hieorhi Kirtadze, lidar apazicyjnaj partyi «Droa» i były člen hruzinskaha parłamienta Elene Chachtaryja, a taksama viadomy hruzinski aktyvist Łuka Naćvlišvili.
Udakładniajecca, što ŭ zatrymańniach pratestujučych asabista ŭdzielničaje načalnik palicyi Batumi Irakli Dhiebuadze.
«Ź miesca akcyi pratestu paviedamlajuć, što zatrymlivajuć masava», — piša vydańnie.
U Tbilisi palicyja zatrymlivaje ŭdzielnikaŭ pratestu, jakija sabralisia kala tbiliskaha restarana Babilo, dzie prachodzić «karparatyŭnaja viečarynka sudździaŭ».
«Kardon palicyi kala tbiliskaha restarana Babilo, dzie prachodzić karparatyŭnaja viečarynka hruzinskich sudździaŭ, składajecca ź niekalkich šerahaŭ palicyi… Karparatyŭnaja viečarynka… praciahvajecca… navat sa śvietłamuzykaj. Sudździ, što zastalisia, praciahvajuć adpačyvać na fonie pratestu na vulicy i kardona palicyi», — paviedamlaje vydańnie.
Dakładnaja kolkaść zatrymanych uviečary 12 studzienia pakul nieviadomaja.
Kamientary