U Maskvie vydatnaha chirurha vyšejšaj katehoryi asudzili na čatyry hady za danaty fondu Navalnaha
Maskoŭskaha chirurha vyšejšaj katehoryi Ivana Ciščanku asudzili na 4 hady kałonii pa spravie ab finansavańni ekstremisckaj arhanizacyi (č. 1 art. 282.3 KK) z-za danataŭ Fondu baraćby z karupcyjaj, piša Radyjo Svaboda.
Jon aformiŭ padpisku na achviaravańni hetaj arhanizacyi i nie admianiŭ jaje paśla pryznańnia struktur Alaksieja Navalnaha ekstremisckimi ŭ 2021 hodzie.
Paśla hibieli palityka ŭ kałonii pieraśled jaho prychilnikaŭ praciahvajecca. Pavodle źviestak vydańnia Choład, apublikavanych u krasaviku, jak minimum 53 čałavieki stali abvinavačanymi pa kryminalnych spravach, źviazanych z Fondam baraćby z karupcyjaj z 2021 hoda. Spravy na tych, chto mieŭ choć jakoje dačynieńnie da struktur Navalnaha, praciahvajuć uzbudžać. Doktara Ciščanku adpravili pad chatni aryšt u vieraśni. Zaraz jon znachodzicca ŭ SIZA №4 Maskvy. Abarona chirurha abskardziła rašeńnie Piaroŭskaha rajonnaha suda.
Ivan Ciščanka, pavodle słoŭ jaho blizkich, maryŭ stać chirurham ź dziacinstva. Jon skončyŭ Rasijski dziaržaŭny miedycynski ŭniviersitet, u kliničnaj ardynatury zajmaŭsia ekstrannaj sasudzistaj chirurhijaj, abaraniŭ kandydackuju dysiertacyju na temu «Uskładnienyja anieŭryzmy brušnoj aorty». Jon abraŭ pracu praktyčnym chirurham, nie cikaviačysia karjernymi pierśpiektyvami.
«Ciščanka vykarystoŭvaje dla lačeńnia pacyjentaŭ, jakim pahražaje amputacyja kaniečnaściaŭ, sučasny hibrydny padychod, jaki spałučaje mahčymaści sasudzistaj i endavaskularnaj chirurhii. Heta dazvalaje dasiahać lepšych vynikaŭ, vykonvajučy apieracyi ź mienšymi ryzykami dla zdaroŭja pacyjenta», — napisaŭ kaleha chirurha.
Kalehi Ivana Ciščanki nie mohuć pavieryć, što jaho adpravili ŭ turmu. Pa vodhukach ludziej, jakija pracavali razam ź im, u jaho vydatnaja reputacyja ŭ prafiesijnym asiarodździ. Daktary praciahvajuć pierapisvacca ź im.
«Kali my dziažuryli razam, u nas była najlepšaja statystyka ŭ klinicy pa vyžyvańni siarod chvorych z razryvam anieŭryzmy brušnoj aorty. U asnoŭnym dziakujučy jaho majsterstvu.
Majo zadańnie było praściejšaje — chutka «adkryć» žyvot i pieracisnuć aortu, a jon filihranna ŭsio vydzialaŭ i rekanstrujavaŭ. Anastamozy «šyŭ», jak na mašyncy «Zinhier», mała chto tak umieje. U chirurhičnym švie vielmi važnaja technika vykanańnia, ad hetaha šmat u čym zaležyć zychod apieracyi. Vania vałodaje hetaj technikaj u daskanałaści. Jamu paduładnyja ŭsie sasudy, pačynajučy ad samaj bujnoj — aorty i zakančvajučy samymi drobnymi, dyjamietram 2 mm. Ciščanka adtočvaŭ svajo majsterstva hadami, kab dać ludziam bolš šancaŭ na vyžyvańnie», — napisaŭ inšy kaleha. «Vania šmat razoŭ u vychadnyja i pa načach pryjazdžaŭ, kab dapamahčy kaleham na składanych apieracyjach».
Ciščanka ŭdzielničaŭ u kanfierencyjach sasudzistych chirurhaŭ u Jeŭropie i Izraili, prachodziŭ stažyroŭku ŭ Paŭdniovaj Karei. Doktar źjaŭlajecca členam Jeŭrapiejskaha tavarystva sasudzistych chirurhaŭ (ESVS).
Vialikaja častka pacyjentaŭ Ciščanki — pažyłyja ludzi. Jon braŭsia za lačeńnie chvorych, ad jakich z-za ŭzrostu admaŭlalisia inšyja daktary.
«Ja nie pamiataju, z čaho pačałosia, ale Vania staŭ chadzić da «babul» u instytucie ŭ jakaści praktyki. Potym jon pasiabravaŭ z pacyjentkami i nie moh ich kinuć. Tak i naviedvaŭ pastajanna: pieraviazvaŭ im nohi, apracoŭvaŭ trafičnyja jazvy. Siarod jaho pastajannych pacyjentak była ŭ minułym lotčyca, jana była jamu vielmi ŭdziačnaja. Praktyka skončyłasia, a jon praciahvaŭ da ich chadzić. Niekalki hadoŭ. Jany ŭsie byli pakinutyja, tamu Vania ich škadavaŭ», — raspaviała Radyjo Svaboda udzielnica hrupy padtrymki Ivana, daŭno i dobra znajomaja ź im.
Kamientary