Kala 20:00 27 žniŭnia nad Rečycaj na nievialikaj vyšyni pralacieŭ dron, jaki pa siłuecie adpaviadaje rasijskamu BpŁA «Hierbiera». Paźniej, u 20:15, mieścičy pačuli huł samalota, jakim akazaŭsia biełaruski źniščalnik, adpraŭleny dla źniščeńnia drona, piša «Fłahštok».
U toj ža viečar bieśpiłotnik pralacieŭ praz Mazyr, dzie ŭ roznych častkach horada čuli charakterny huk, što nahadvaje huk mapieda. Ukrainskija manitorynhavyja kanały nie paviedamlali pra pierasiačeńnie miažy Biełarusi rasijskimi BpŁA ŭ toj čas. Heta moža śviedčyć pra toje, što ŭ Homielskuju vobłaść uvarvalisia drony-imitatary «Hierbiera», jakija drenna fiksujucca radarami.
Akramia taho, padčas pavietranaj ataki ŭ noč na 28 žniŭnia dźvie rasijskija rakiety mahli pralatać nad terytoryjaj Biełarusi. U pieršym vypadku rakieta mahła pralatać nad vystupam Brahinskaha rajona.
U druhim vypadku — dźvie rakiety nad Homielem, paviedamiŭ Fłahštoku ŭkrainski manitorynhavy kanał «jeRadar». Palot zafiksavany kala 3 hadziny nočy. Adnak inšyja kanały nie paviedamlali pra taki fakt, infarmacyi ad žycharoŭ Homielskaha rajona pra fiksacyju huku palotu taksama nie było.
Pavodle aficyjnaj infarmacyi Pavietranych sił USU, hetaj nočču Rasija atakavała Ukrainu ŭ tym liku balistyčnymi rakietami «Iskander-M»/KN-23, vypuščanymi z Branskaj vobłaści. Imavierna, mienavita jany mahli pralatać nad Homielem.
Asnoŭny ŭdar byŭ nakiravany na Kijeŭ, dzie, pavodle dadzienych na poŭdzień, paviedamlajecca ŭžo pra 15 zahinułych mirnych žycharoŭ, siarod jakich čaćviora dziaciej. Rakiety trapili ŭ žyłyja damy i prynieśli maštabnyja razbureńni, razbor zavałaŭ praciahvajecca. Kolkaść paciarpiełych z-za ataki pa hramadzianskaj infrastruktury Kijeva ŭžo pieravysiła 50 čałaviek.
Kamientary