Łukašenka: My hatovyja zaklučyć vialikuju ździełku z ZŠA

U naradzie ŭdzielničajuć premjer Alaksandr Turčyn, kiraŭnik Administracyi Łukašenki Dźmitryj Kruty, dziaržsakratar Rady biaśpieki Alaksandr Valfovič, staršynia Kamiteta dziaržaŭnaj biaśpieki Ivan Cierciel, hienprakuror Andrej Švied, paviedamlaje BiełTA.

Łukašenka zajaviŭ:

«Budziem čakać ich [amierykancaŭ] prapanovy hłabalnyja, vialikaj ździełki, jak jany ŭmiejuć kazać (lubiać jany hetyja vialikija ździełki). My da hetaha hatovyja. My hatovyja ź imi zaklučyć vialikuju ździełku.

Na adnoj šali ich pytańni, prośby i patrabavańni, na druhoj šali — našy pytańni i patrabavańni. Rašajem? Davajcie budziem vyrašać. My da hetaha hatovyja.

Prapanovy Donalda Trampa ŭ hetym płanie ja absalutna aceńvaju narmalna. Ale pavinny być uličanyja i našy intaresy. I ŭsio pavinna być ščyra, jak kaliści my z amierykancami damovilisia».

Alaksandr Łukašenka pry hetym padkreślena liśliviŭ Trampu. Jon, u pryvatnaści, padtrymaŭ «kroki Prezidenta ZŠA Donalda Trampa (vialikaja litara — u viersii pres-słužby Łukašenki i BiełTA — NN) pa naviadzieńni paradku na Blizkim Uschodzie». Jon taksama zajaviŭ, što Tramp zasłuhoŭvaje Nobieleŭskaj premii miru.

Nahadajem, što ŭ kastryčniku ZŠA moža ŭpieršyniu pastavić Ukrainie rakiety vialikaj dalokaści «Tamahaŭk». Raniej Ukrainie pastaŭlała tolki zbroju małoj dalokaści, pryčym u abmiežavanych kolkaściach.

«Nijakija «Tamahaŭki» pytańnia nie vyrašać. Heta eskaluje situacyju da jadziernaj vajny. Napeŭna, heta lepš za ŭsich razumieje Donald Tramp, jaki nie śpiašajecca addavać hetuju śmiertanosnuju zbroju i dazvalać bić uhłyb Rasii, jak na heta raźličvaje Prezident Zialenski», — skazaŭ Alaksandr Łukašenka na naradzie (vialikaja litara — u viersii pres-słužby Łukašenki i BiełTA — NN).

U aficyjnych paviedamleńniach dziaržSMI pra naradu ŭ Łukašenki rabiŭsia akcent na tym, što «palityka na adnaŭleńnie adnosin z ZŠA biezumoŭna pavinna budzie budavacca vyklučna ŭ biełaruskich intaresach».

Pry hetym Alaksandr Łukašenka padkreśliŭ, što Biełaruś pad jahonym kiravańniem i nadalej zastaniecca ŭ zonie ŭpłyvu Rasii.

«Z ulikam namiečanaha prahresu ŭ kantaktach z Vašynhtonam, nam nieabchodna vypracavać dalejšy ałharytm biełaruska-amierykanskich adnosin na pierśpiektyvu. Pry hetym my pavinny bolš vyrazna vyznačyć svaje pryjarytety.

Taksama važna pravieści, jak u nas modna ciapier kazać, čyrvonyja linii, pierachod jakich dla nas nieprymalny. Važna ŭličvać, kab našyja dziejańni ni ŭ jakim razie nie nanieśli škody nie tolki biełaruska-rasijskim, ale i biełaruska-kitajskim adnosinam, a taksama našym abaviazacielstvam pierad inšymi družalubnymi krainami ŭ ramkach udziełu Biełarusi ŭ jeŭrazijskich intehracyjnych abjadnańniach. Heta śviatoje.

My damovilisia, padpisali adpaviednyja pahadnieńni. Tamu pavinny dziejničać u hetych miežach», — adznačyŭ Łukašenka.

Alaksandr Łukašenka taksama vykazaŭ škadavańnie, što ZŠA zastajucca na pazicyi padtrymki demakratyi, hramadzianskaj supolnaści i viaršenstva prava ŭ Biełarusi. «Amierykanskaj administracyjaj, na žal, pa-raniejšamu realizujecca palityka pa prasoŭvańni niejkich psieŭdademakratyčnych kaštoŭnaściej. My heta taksama bačym. Na słovach jany byccam ad hetaha adyšli. A na spravie — ničoha takoha».

Patrebu narmalizacyi adnosin z ZŠA Alaksandr Łukašenka abhruntavaŭ nieabchodnaściu źniaćcia sankcyj:

«Varta ŭličvać, što na hety momant u dačynieńni da Biełarusi z boku ZŠA i ich sajuźnikaŭ, asabliva Jeŭrapiejskaha sajuza, praciahvajuć dziejničać sankcyi. Tak, my navučylisia žyć pad ciskam hetych sankcyj, pracavać, choć nie biez prablem. Ale jany isnujuć. Jany nam škodziać, adciahvajuć nas ad vyrašeńnia mnohich prablem».

U Biełarusi za kratami zastajecca bolš za 1300 palitźniavolenych, jašče tysiačy ludziej asudžanyja na abmiežavańnie voli. Niekalki socień tysiač ludziej byli vymušanyja pakinuć Biełaruś, ratujučysia ad masavych represij. Biełaruś zastajecca saŭdzielnicaj zachopnickaj vajny Rasii suprać Ukrainy i znachodzicca ŭ stanie, faktyčna, hibrydnaj vajny z čatyrma ź piaci svaich krain-susiedak. 

• 3
• 1
• 8
• 15
• 1
• 0
• 11
• 0