U Hrodnie vyjšła kniha pra avanturysta, jaki kupiŭ pałac u centry horada za kartačny vyjhryš
Hrodzienskaja piśmieńnica Śviatłana Nieściarenka vypuściła knihu «Hraf Valicki, svaja hulnia» — mastackuju historyju pra Michała Valickaha, avanturysta i hulca XVIII-XIX stahodździaŭ, bahaćcie jakoha vyrasła z kartačnych vyjhryšaŭ i handlu mastactvam. Realnych źviestak pra hrafa zachavałasia niašmat, tamu ŭ knizie fakty pieraplatajucca z vydumkaj, piša Hrodna.life.
«U knizie try častki, 54 raździeły, i kožny ź ich — asobnaja pryhoda. Sučasny student-historyk mahičnym čynam traplaje ŭ pačatak XIX stahodździa, u pałac Valickaha. Toj jamu kaža, što adziny, chto zmoža viarnuć jaho nazad dadomu, — heta čaraŭnik Alasandra Kalijostra. Na jaho pošuki jany adpraŭlajucca razam. I ŭ darozie hraf raskazvaje studentu pra svajo žyćcio», — paviedamiła «Viačerniamu Hrodna» sama aŭtarka, Śviatłana Nieściarenka.
Michał Valicki naradziŭsia ŭ 1746 hodzie ŭ Navahrudku ŭ siamji źbiadniełaha šlachcica Mickieviča. Vučyŭsia ŭ jezuitaŭ u Mahilovie, zatym pracavaŭ u minskim sudzie, ale chutka pakinuŭ słužbu. Paśla pierajezdu ŭ Varšavu staŭ sprytnym hulcom u karty i biljard, viadomym tym, što nikoli nie prajhravaŭ šuleram. Paźniej žyŭ u Lvovie, Vienie i Paryžy, dzie ŭvajšoŭ u vyšejšaje hramadstva, hulaŭ pry dvary francuzskaj karalevy Maryi-Antuaniety i razbahacieŭ, handlujučy kaštoŭnaściami.
Paźniej kupiŭ dvaranskaje proźvišča Valicki i tytuł hrafa. Viarnuŭšysia ŭ Biełaruś, nabyŭ u 1793 hodzie pałac u Hrodnie. Hety budynak znajomy mnohim hrodziencam. Jon znachodzicca na vulicy Fiłareta, 1, ciapier tam archirejskaje padvorje. Taksama hraf kupiŭ majontak z fabrykami ŭ Aziorach.
Jon byŭ miecenatam, achviaravaŭ Vilenskamu ŭniviersitetu i dapamahaŭ studentam z proźviščami Mickievič i Valicki. Pamior u Vilni va ŭzroście 82 hadoŭ, zaviaščaŭšy svajo bahaćcie svajakam i ŭniviersitetu. Jaho kalekcyi kaštoŭnaściaŭ paśla apynulisia ŭ Ermitažy.
Kab sabrać uvieś materyjał, Śviatłana Nieściarenka paŭhoda vyvučała roznyja dakumienty. Pavodle jaje słoŭ, składanaść u pošuku infarmacyi była ŭ tym, što pra žyćcio Valickaha niama nivodnaha dakładnaha fakta. Usie jany supiarečać adzin adnamu albo nijak nie paćviardžajucca.
«Jość dźvie krynicy, adkul možna ŭziać choć jakuju-niebudź infarmacyju. Heta ŭspaminy Fadzieja Bułharyna i polskaha piśmieńnika Hienryka Žavuskaha, ale i jany supiarečać adny adnym. Niekatoryja dakumienty zachoŭvajucca ŭ našym hrodzienskim archivie, ale tolki pra toj pieryjad, kali Valicki žyŭ u Hrodnie. A jakim jon byŭ u maładości, nieviadoma. Sam jon pra siabie nikoli nie raskazvaŭ i, pražyŭšy 82 hady, nijakaj aŭtabijahrafii nie pakinuŭ, choć byŭ vydatnym apaviadalnikam», — kaža krajaznaŭca.
Knižka vyjšła nakładam 2000 asobnikaŭ. Nabyć jaje možna ŭ kniharniach horada, a taksama ŭ «Akademknizie» ŭ Minsku.
U 2024 hodzie Michał Valicki staŭ hierojem pieršaha hrodzienskaha histaryčnaha komiksa.
Ciapier čytajuć
Zahnuŭsia biznes člena chakiejnaj kamandy Łukašenki, jaki abiacaŭ pabudavać łyžny maniež za Viarchoŭnym sudom uzamien na łasyja ŭčastki1
Kamientary