Raskazvajem pra miły instrumient, jaki dapamoža pierajści sa staroha hodu ŭ novy — jon jość pa-biełarusku

Što takoje YearCompass?

YearCompass — heta inicyjatyva, stvoranaja ŭ Budapiešcie ŭ 2012 hodzie. Hrupa siabroŭ chacieła niejak asensavać svoj minuły hod i zapłanavać nastupny, tamu stvaryła sšytak z pytańniami. Ideja była nastolki zapatrabavanaj, što chutka vyjšła za miežy Vienhryi. Siońnia bukletam karystajucca miljony ludziej, a vałanciory pierakładajuć jaho na dziasiatki moŭ, uklučajučy biełaruskuju.

Aŭtary kažuć, što nie varta pierachodzić da płanavańnia 2026 hoda, pakul nie raźbiareciesia ź minułym hodam. Buklet zmušaje vas padniać archivy: prahartać kalandar, pahladzieć fota ŭ halerei telefona i adkazać na niazručnyja pytańni. Kamu vy ŭdziačnyja? Što vy nie paśpieli? Jakuju samuju vialikuju pamyłku zrabili?

Dla ludziej, jakija časta žyvuć u stanie niavyznačanaści, heta dobry sposab viarnuć sabie adčuvańnie kantrolu. Praŭda, na zapaŭnieńnie bukleta treba niekalki hadzin, i varta heta ŭličyć.

Jak padrychtavacca da zapaŭnieńnia

1. Ściahnuć buklet

Ściahnuć jaho možna na aficyjnym sajcie yearcompass.com. Na hałoŭnaj staroncy treba prakrucić uniz da śpisu moŭ i vybrać «Biełaruskaja».

2. Abiarycie: drukavać ci zapoŭnić na kampjutary

Aŭtary nastojliva rajać zapaŭniać kompas ad ruki, bo heta lepš zadziejničaje niejronnyja suviazi. Jość dva varyjanty fajłaŭ:

• Standartny (A4): Adna staronka bukleta na adzin list papiery. Pasuje, kali vy nie chočacie zajmacca naładami druku.
• Buklet (A5): Samy papularny varyjant, jaki składvajecca ŭ pryhožy sšytak.

Pry druku abirajcie «Dvuchbakovy druk» (Two-sided) i naładu «Pieravaročvać pa karotkim krai» (Flip on short edge). Kali vybrać doŭhi kraj, pałova staronak budzie dahary nahami.

Kali niama pryntara, možna zapaŭniać PDF na płanšecie sa styłusam ci vykarystoŭvać ličbavuju viersiju (Fillable PDF), dzie možna nabirać z kłavijatury.

Jak zapaŭniać YearCompass

1. Nastroicca. Vam spatrebicca minimum 3‑4 volnyja hadziny, kali vas nichto nie budzie čapać. Idealna raźbić heta na dva viečary — naprykład, 28 i 29 śniežnia. Siadźcie zručna, vaźmicie ŭlubionuju asadku, uklučycie spakojny płejlist i nalicie sabie pryjemnaha napoju.
2. Raźvitacca z 2025-ym. Tut budzie šmat pisaniny. Vy projdzieciesia pa śfierach: praca, siamja, siabry, adpačynak, mientalnaje zdaroŭje.
3. Adkryjcie Google Photos abo archiŭ storyz u instahramie za hod, nie zabyvajciesia pra kalandar i miedyja z Telegram (kali vy ich nie vydalajecie). Vy ździviciesia, kolki ŭsiaho zabylisia.
4. Važny raździeł — «Adpuścić». Napišycie tudy ŭsio, što pieraškadžaje vam ruchacca, i pakińcie heta ŭ starym sšytku.
5. Stvaryć 2026-y. Tolki paśla taho, jak pierahorniecie staronku «Minułaje», pačynajcie płanavać. Tut nie treba pisać mety pra šlach da idealnaj viersii siabie — stvaralniki prapanujuć być tvorčymi i nie zabaraniać sabie maryć.

Sens nie ŭ tym, kab vykanać usie punkty idealna, a ŭ tym, kab spynicca i zrazumieć, dzie vy znachodziciesia ciapier i kudy chočacie ruchacca dalej.

Pasprabujcie. U horšym vypadku vy prosta pamalujecie ŭ sšytku. U lepšym — uvojdziecie ŭ 2026‑ty ź jasnaj hałavoj i spakojem, jakoha tak nie chapaje.

• 2
• 1
• 0
• 0
• 0
• 0
• 0
• 2