Prybytak Volkswagen upaŭ na 44%. Kancern skarocić 50 tysiač pracoŭnych miescaŭ u Hiermanii
Najbujniejšy jeŭrapiejski aŭtavytvorca Volkswagen da 2030 hoda skarocić 50 tysiač pracoŭnych miescaŭ u Hiermanii, pakolki jaho prybytak upaŭ da samaha nizkaha ŭzroŭniu z 2016 hoda — paśla vypłaty padatkaŭ u 2025 hodzie jon skaraciŭsia prykładna na 44%, piša Bi-bi-si.
Hienieralny dyrektar pradpryjemstva Olivier Błume paviedamiŭ akcyjanieram, što skaračeńni adbuducca ŭ Hiermanii i zakranuć usiu hrupu: Volkswagen Group naležać niekalki inšych viadomych brendaŭ, u tym liku lehkaviki Audi, Bentley, Lamborghini, Porsche, SEAT i Škoda, hruzaviki MAN i Scania i matacykły Ducati.
«Ahułam, da 2030 hoda ŭ hrupie Volkswagen u Hiermanii budzie skaročana kala 50 tysiač pracoŭnych miescaŭ, — napisaŭ Błume ŭ liście akcyjanieram u hadavoj spravazdačy kampanii. — My pracujem u pryncypova inšych umovach».
Kancern zajaviŭ, što padzieńnie prybytku vyklikana ŭviadzieńniem Złučanymi Štatami impartnych myt, žorstkaj kankurencyjaj z kitajskimi vytvorcami i vysokimi vydatkami na restrukturyzacyju ŭ suviazi ź pierachodam na vytvorčaść elektramabilaŭ.
Volkswagen maje namier zakryć try zavody ŭ Hiermanii i zvolnić dziasiatki tysiač čałaviek.
Kampanija prahnazuje palapšeńnie situacyi ŭ nastupnym hodzie, ale jaje finansavy dyrektar Arno Antlic padkreśliŭ, što joj pryjdziecca zasiarodzicca na «žorstkim» skaračeńni vydatkaŭ. Volkswagen užo dasiahnuŭ pahadnieńnia z prafsajuzami ab skaračeńni bolš jak 35 tysiač pracoŭnych miescaŭ pa ŭsioj krainie «sacyjalna adkaznym čynam» da 2030 hoda, što dazvolić aščadzić kala 15 miljardaŭ jeŭra.
Źnižeńnie popytu ŭ Kitai i taryfy
Naroŭni ź inšymi niamieckimi aŭtavytvorcami Volkswagen mocna paciarpieŭ ad źnižeńnia popytu na svaje aŭtamabili ŭ Kitai, jaki raniej zastavaŭsia najvažniejšym rynkam. U toj ža čas kitajskija brendy vychodziać na rynak Jeŭropy, uzmacniajučy cisk na jeŭrapiejskich vytvorcaŭ.
Rašeńnie prezidenta ZŠA Donalda Trampa ŭvieści 25‑pracentnyja myty na impart aŭtamabilaŭ jašče bolš pahoršyła situacyju.
U svaich hadavych spravazdačach Volkswagen paviedamiŭ, što jahony čysty prybytak paśla vypłaty padatkaŭ letaś źniziŭsia z 12,4 miljarda jeŭra da 6,9 miljarda jeŭra. Na 2026 hod Volkswagen prahnazuje bazavuju rentabielnaść na ŭzroŭni 4—5,5%.
Antlic papiaredziŭ, što rentabielnaść hrupy «nie źjaŭlajecca dastatkovaj u doŭhaterminovaj pierśpiektyvie».
«My zmožam dasiahnuć hetaj mety, tolki kali budziem praciahvać žorstka skaračać vydatki», — skazaŭ jon.
Na aŭtapram prypadaje kala 20% usioj pramysłovaj vytvorčaści Hiermanii i 6% VPP krainy. Industryja napramuju daje pracu amal 780 tysiačam čałaviek. Z 2017 da 2023 hoda prodažy VW źnizilisia z 10,7 miljona da 9,2 miljona adzinak.
U čym pryčyny kryzisu: «elektryčnaja revalucyja» i vysokija vydatki
Pakolki krainy ES źbirajucca pastupova admovicca ad aŭtamabilaŭ z ruchavikom unutranaha zharańnia, vytvorcam davodzicca inviestavać sotni miljardaŭ jeŭra ŭ elektramabili. Adnak čakanaj aptymistami «revalucyi» pakul nie adbyłosia. U kancy 2023 hoda ŭ Hiermanii admianili subsidyi dla pakupnikoŭ elektramabilaŭ, što pryviało da padzieńnia ich prodažu na 27%.
Akramia taho, Hiermanija zastajecca samym darahim miescam u śviecie dla vytvorčaści mašyn (siaredni taryf u halinie — kala 5300 jeŭra na miesiac). Uvarvańnie Rasii va Ukrainu i admova ad tannaha rasijskaha hazu pryviali da rezkaha rostu cen enierhii. Vajna ZŠA i Izraila suprać Irana pahražaje zrabić hetuju prablemu jašče bolš vostraj. Amierykanskija taryfy i 10‑pracentnaje padzieńnie popytu ŭ Kitai kančatkova padkasili industryju.
Čamu Mierc tak strymana reahuje na Trampaŭ zamach na Hrenłandyju? Bo Hiermanija najbolš zaležnaja ad ZŠA
Niamieckaja ekanomika pałamałasia, a «płana B» ni ŭ koha niama
Dyziel moža pieramahčy elektramabili? Jak jeŭrapiejski aŭtapram akazaŭsia na miažy kryzisu
Kitaj upieršyniu staŭ suśvietnym lidaram na rynku aŭto. Jak tak atrymałasia?
Tanki zamiest aŭtamabilaŭ. VPK zamianiaje aŭtapramysłovaść u jakaści hałoŭnaha ruchavika ekanomiki Hiermanii
Kamientary