Rasijskija turysty na fonie paliŭnaha kryzisu ŭ Krymie i intensiŭnych abstrełaŭ daroh na akupavanych terytoryjach Ukrainy pačali masava admaŭlacca ad adpačynku na krymskich kurortach, piša «Ahientstvo».
Karespandent RBK, jaki dabraŭsia z Maskvy ŭ Simfieropal ciahnikom «Taŭryja» 9 červienia, śviedčyć, što ŭ kupe jechali ŭsiaho pa adnym-dva čałavieki. Pry hetym sami pasažyry adznačyli, što padčas sakavickaha startu prodažaŭ kvitki byli raskupleny za pieršyja paŭhadziny.
Dyrektar turapieratara «TurEtno» Alena Štrynhiel paviedamiła, što na červień anulujecca 80% zabroniravanych zajezdaŭ, a na lipień-žnivień — kala 50%. Pavodle jaje słoŭ, choć da majskich śviataŭ kampanija vykanała płan na 60—70%, ciapier idzie masavy adkat, niahledziačy na nievialikuju kolkaść novych broniaŭ na kaniec leta.
Pradstaŭnik inšaj turkampanii adznačyŭ, što zaraz arhanizacyi siektara vymušany tracić resursy, na jakija mielisia žyć zimoj. «My ŭžo ciapier za paŭhoda patracili bolš, čym zarabili», — pryznaŭsia jon.
Pradstaŭnik hatela «Rasśviety-Zakaty» ŭ Bachčysarajskim rajonie Dźmitryj Tkačenka raspavioŭ, što za 10 dzion paliŭnaha kryzisu kolkaść admoŭ pieravysiła pakazčyk za ŭvieś minuły hod. Zahruzka hatela składaje ŭ siarednim 30% zamiest płanavanych 65—70%. Z anałahičnymi prablemami sutyknulisia i ŭładalniki haściavych damoŭ pad Ałuštaj, dzie admianiłasia 90% červieńskich zajezdaŭ (pryjazdžaje tolki adzin turyst ź dziesiaci).
Hateljery i apieratary pavinny viartać klijentam poŭny košt pasłuh, adnak heta atrymlivajecca nie zaŭsiody. Naprykład, uładalnica adnaho z haściavych damoŭ patraciła atrymanyja pieradapłaty na ramont budynka, i ciapier u jaje prosta niama srodkaŭ, kab raźličycca ź ludźmi.
Krymski vinarob Aleh Repin paviedamiŭ, što za apošni tydzień kala 70—80% klijentaŭ admianili zajaŭki na ekskursii pa jaho haspadarcy, spasłaŭšysia na abjektyŭnyja pryčyny. Takaja ž situacyja nazirajecca ŭ jaho znajomych restarataraŭ i hateljeraŭ.
Na hetym fonie vice-prezident Rasijskaha sajuza turindustryi Siarhiej Ramaškin zajaviŭ, što z pačatku hoda Krym pakazvaŭ rost na 10—15% hod da hoda, tamu navat z ulikam ciapierašnich admien paŭhadavy plus zachavajecca na ŭzroŭni 11—12%.
Prablemy z łahistykaj i kiroŭcami bienzavozaŭ
Na fonie ŭdaraŭ bieśpiłotnikaŭ pa hruzavikach na tak zvanaj trasie «Navarosija» («suchaputny most» u Krym) uźnikli surjoznyja prablemy z naboram kiroŭcaŭ dla vielikahruznaha transpartu. Hetuju infarmacyju paćvierdzili krynicy na paliŭnym rynku. Kab źnizić ryzyki, furam na hetaj trasie dazvolili razhaniacca da 100 km/h, a sami hruzaviki ciapier ruchajucca ŭ supravadžeńni vajskovych mašyn z aŭtamatčykami.
U mai Ukraina rezka pavialičyła kolkaść udaraŭ pa rasijskich hruzavikach na klučavych łahistyčnych maršrutach akupavanych terytoryj, a taksama pa mastach, jakija viaduć u Krym. Pavodle analizu OSINT-analityka Klemienta Malina, z pačatku maja byli atakavany jak minimum 415 hruzavikoŭ i paškodžany nie mienš za šeść mastoŭ.
A my vam kazali: «nie dumajcie, što heta kapiejki»! Stali viadomyja źviestki, kolki padachodnaha biełarusy Litvy pieraličyli roznym hramadskim strukturam2929
Kamientary