Ultymatum Pucinu z łaźni i abmierkavańnie burhieraŭ. Novyja parodyi na Łukašenku rvuć instahram
Pakul na TV i scenach tatalnaja cenzura, biełarusy šukajuć humar anłajn. A niejrasietki dazvalajuć stvarać palityčnuju satyru biaśpiečna dla aŭtaraŭ. Łukašenka narakaje na kambikorm u «MakBai», rekłamuje zachodnija brendy i ŭ łaźni pahražaje Pucinu — viasiołyja dypfejki ŭ novym instahram-kanale.
Sučasnyja mahčymaści štučnaha intelektu dasiahnuli takoha ŭzroŭniu, što zhienieravanaje fota i videa stanovicca amal nieadroznym ad sapraŭdnych zdymak. Šmatlikija suśvietnyja znakamitaści i palityki paśpieli sutyknucca z prablemami, jakija niasuć dypfejki: ad rekłamnych rolikaŭ da sprob palityčnaj dyskredytacyi. Čarha dajšła i da Alaksandra Łukašenki.
Niekalki miesiacaŭ tamu ŭ Instagram-je źjaviłasia staronka pad nikam alex_anderlukashenko1954. Nieviadomy aŭtar pačaŭ napaŭniać jaje kantentam, całkam stvoranym z dapamohaj ŠI.
«Kambikorm» u «MakBai»
Adno z apošnich videa, jakoje vyklikała chvalu kamientaroŭ, stvorana pa matyvach vizitu biełaruskaha palityka ŭ sietku «MakBaj» (były McDonald's). Hladač bačyć zvykłuju karcinu: stoł, zastaŭleny burhierami, i viernaha špica Umku pobač. Hieroj videa razvažaje pra jakaść fastfudu ŭ svaim niepaŭtornym styli:
«Vyrašyŭ znoŭku pakaštavać hetuju atrutu zamorskuju. Vuń, sabaku navat drenna. Nie viedaju, što moładź znajšła ŭ hetym kambikormie. Ja voś užo šosty burhier źjadaju i nijak nie zrazumieju», — kaža ŠI-piersanaž.
Ale kancoŭka videa žorstkaja. Jakaja? Pahladzicie sami.
Ad Miłana da Davosa
Aŭtar akaŭnta nie abmiažoŭvajecca kabinietnymi ci sielskimi dekaracyjami. Dziakujučy niejrasietkam, biełaruskaha dyktatara možna pabačyć u samych roznych łakacyjach. Voś jon špacyruje pa vulicach Miłana ŭ stylnym dyzajnierskim adzieńni.
A voś — sprytna zakidaje baskietbolny miač u košyk.
«Zajechaŭ da chłopcaŭ u Bardo. Pakazaŭ hetamu hieta, što takoje biełaruskaja karobačka! Kali b nie kalena, ja b i źvierchu zakłaŭ», — takim podpisam aŭtar supravadžaje videa.
Nie abyšoŭ uvahaj stvaralnik kanała i mižnarodnyja ambicyi Łukašenki. U adnym ź videa možna pabačyć dyktatara na trybunie Suśvietnaha ekanamičnaha forumu ŭ Davosie:
«Ci nieabchodna mianiać terminy ŭborki pšanicy? Biezumoŭna. Ci važna heta abmiarkoŭvać ciapier u Davosie? Biezumoŭna».
A tut jon vystupaje na Radzie miru, prapanujučy siabie na pasadu jaje staršyni zamiest Trampa.
U inšym siužecie Łukašenka sočyć za sustrečaj Uładzimira Zialenskaha sa Śviatłanaj Cichanoŭskaj.
Hałoŭny chit: ultymatum Pucinu z łaźni
Najbolšuju papularnaść (zvyš 1,6 miljona prahladaŭ) atrymała videa, dzie aŭtar źmiaściŭ hieroja ŭ łaźniu i ŭkłaŭ u jaho vusny rezkuju zajavu:
«Ja chaču surjozna skazać: Vałodzia, ty pačaŭ hetu vajnu. Ty zabiŭ i ŭkraincaŭ, i svaich ruskich. Užo na miljony lik idzie. Što ty chočaš dalej rabić? Vajavać z Amierykaj ci Jeŭropaj? Heta bieź mianie. Ja dziesiać hadoŭ sprabavaŭ vybudavać siabroŭstva z Polščaj. Ty za adzin hod usio razburyŭ.
Ja ciapier škaduju, što ciabie nie prydušyŭ u rezidencyi majoj u 23‑m hodzie. Karaciej — ja bolš nie mahu heta ciarpieć. I tamu ja ŭsiu infarmacyju, jakaja ŭ mianie jość, addaju brytanskim Mi-6 i amierykancam. Niachaj jany ciabie ŭcichamirać. I kitajcu svajmu skažy — što mnie nie patrebny jaho padački. Ja na kaleniach stajać nie budu».
Hety siužet atrymaŭ praciah: u adnym z nastupnych rolikaŭ, zroblenym u styli navin biełaruskaha telebačańnia, pakazana, jak Łukašenka nibyta vykonvaje abiacańnie i pieradaje zachodnim śpiecsłužbam «ceły taz dakumientaŭ» na sustrečy ŭ Ašmianach.
«Moža, jon pahladzić na heta videa i da jaho dojdzie, što treba tak i skazać! Voś było b vydatna», — maryć adzin z kamientataraŭ.
Kamientary