Upieršyniu z Rasii ŭciok dziejny čynoŭnik takoha ŭzroŭniu.
22 krasavika premjer-ministr Mišuścin vyzvaliŭ Dzianisa Bucajeva ad pasady namieśnika kiraŭnika ministerstva pryrodnych resursaŭ. Infarmavanaje rasijskaje vydańnie «Viedomosti» śćviardžaje, što Bucajeŭ u toj ža dzień vyjechaŭ z Rasii praź Minsk.
U minułym hety čynoŭnik zajmaŭ pasadu kiraŭnika Rasijskaha ekałahičnaha apieratara (REA). Pry kancy krasavika ananimnyja telehram-kanały pisali pra zaviadzieńnie spravy suprać dziejnaha dyrektara REA. Pavodle danych «Viedomostiej», kryminalnyja spravy byli zaviedzienyja suprać jašče dvuch top-mieniedžaraŭ REA, a ŭ materyjałach spravaŭ zhadvajecca i sam Bucajeŭ.
Pavodle słoŭ krynicy inšaha rasijskaha vydańnia, Faridaily, Bucajeŭ źbieh z Rasii jašče 18 krasavika, a ŭkaz ab jaho adstaŭcy byŭ padpisany ŭžo paśla jaho adjezdu.
«Pavodle infarmacyi našych surazmoŭcaŭ, Bucajeŭ śpiecham vyjechaŭ u Minsk, a adtul — u Tbilisi. U vyniku čynoŭnik dabraŭsia da ZŠA, čuli dźvie krynicy», — piša Faridaily.
Vydańnie adznačaje, što heta pieršy viadomy vypadak uciokaŭ z Rasii dziejnaha čynoŭnika takoha ŭzroŭniu. Taksama heta pieršy z 2024 hoda vypadak, kali dziaržsłužačamu ŭdałosia vyratavacca ad kryminalnaha pieraśledu.
«[Bucajevu] pašancavała mieć siabroŭ, jakija svoječasova jaho papiaredzili», — cytuje krynicu niezaležnaje rasijskaje vydańnie «Astra».
Kamientary