Hałoŭnym śpikieram Žanočaha forumu ŭ Minsku stanie rasijski kryndžovy psichołah, jaki raskazvaŭ pra «pamiać žanočych pałavych hub»
Women Forum projdzie ŭ Minsku naprykancy maja. Vučyć biełarusak, jak sumiaščać karjeru i adnosiny, budzie mužčyna — psichołah Mark Bartan, viadomy svaimi nieadekvatnymi vykazvańniami.
Mark Bartan naradziŭsia ŭ Małdovie, a ciapier aktyŭna pracuje ŭ Rasii. Pačynaŭ jon z vyvučeńnia teałohii va ŭniviersitecie, potym pieraklučyŭsia na psichałohiju.
Na jaho instahram padpisana 2,4 miljona čałaviek. Bartan byŭ televiadučym, pisaŭ knihi — navat jak muzyka albom vypuściŭ. A sioleta na ekrany kinateatraŭ vyjdzie ramantyčnaja kamiedyja «Za kachańnie», u jakim hety roznabakovy čałaviek hraje rolu.
Aryjentavany Bartan na žančyn — jon prydumaŭ siem pravił, jakija byccam by dapamohuć kožnaj stać ščaślivaj. Sam psichołah, jaki vučyć žančyn budavać harmaničnyja adnosiny, žanaty ŭžo treci raz.
Bartana časta abvinavačvajuć u mizahinii i taksičnaj muskulinaści. Viadomy jon taksama svaimi kryndžovymi vykazvańniami.
U adnym ź videa psichołah, naprykład, raspaviadaje: «Žanočyja pałavyja huby zapaminajuć dyjamietr mužčynskaha člena».
U inšym razvažaje, što ŭsie žančyny — taleračnicy, a kali mužčyna nie hatovy płacić za pachod u restaran, dyk heta śviedčyć pra jaho evalucyjnuju nieprydatnaść.
Mark taksama kazaŭ: «Čym bolš u žančyny seksualnych partnioraŭ, tym chutčej jana apyniecca ŭ durcy». I dadavaŭ, što paśla źmieny partniora ŭ žančyny pierabudoŭvajucca imunitet, repraduktyŭnaja i niervovaja sistemy.
Siarod jaho prychilnic davoli šmat prapahandystak: heta Kaciaryna Krutalevič z łukašenkaŭskaha pułu, Maryna Maroz z ANT, Nina Mažejka i Nastaśsia Rudzkaja z BT.
Pad forum zabraniravali Prime Hall — raźličvajuć sabrać 1400 udzielnic. Zapłanavali vystup 8 śpikieraŭ — ź ich 5 pryjeduć z Rasii.
Cikava, što cen na kvitki na forum u adkrytym dostupie niama. Kab daviedacca, kolki ž treba zapłacić, treba pakinuć zajaŭku na sajcie i dačakacca zvanka.
«Naša Niva» vyśvietliła, što ceny byli ad 115 rubloŭ (taryf «Standart», na sajcie paznačana, što ŭsie kvitki ŭ hetaj katehoryi raskupleny) da 705 rubloŭ (za VIP — ich byccam zastałosia 8 z 50).
Darečy, u VIP-taryf uvachodzić śniadanak z adnoj sa śpikierak, ahulny abied, mahčymaść zadać pytańnie i indyvidualny bejdž ź imiem udzielnicy i jaje fotazdymkam.
Chto ž pojdzie słuchać Bartana i kampaniju? Imavierna, niekalki dziaŭčat z atačeńnia Łukašenki — jany padpisalisia na staronku forumu ŭ instahramie.
Tym časam u treds aburajucca, što arhanizatary forumu z davoli vialikimi cenami na kvitki šukajuć dla mierapryjemstva fatohrafa, jaki hatovy papracavać na im biaspłatna.
Kamientary