Dobraachvotnik Radzivon Batulin u svaim kanale paćvierdziŭ hibiel 23‑hadovaha biełaruskaha dobraachvotnika Cichana Klukača. «Pareštki «Franca» ŭdałosia vyciahnuć», — napisaŭ jon.
Los Cichana Klukača apošnimi dniami byŭ niajasny, paviedamlałasia i pra toje, što jon zahinuŭ, i pra toje, što jon źnik bieź viestak.
Ale biełaruski dobraachvotnik Radzivon Batulin paćvierdziŭ drennuju navinu.
«Pareštki «Franca» ŭdałosia vyciahnuć. Śledam za ŭsimi nieabchodnymi pracedurami adbudziecca raźvitańnie», — napisaŭ jon.
Kali i pry jakich abstavinach zahinuŭ Klukač, nieviadoma.
Cichan Klukač — były palitviazień. Jon naradziŭsia i vyras u Bieraści. Palitviaźniem staŭ u 18 hadoŭ, sprabujučy ŭratavać ad źniavoleńnia dziaŭčynu, u jakuju zakachaŭsia.
Tady siabroŭka Cichana, 18‑hadovaja Safija Małaševič, razmalavała bałončykam z farbaj sistemu «Rubiež» — ščyty śpiecyjalnych srodkaŭ abharodžvańnia. Cichan na sudzie sprabavaŭ uziać adkaznaść za heta na siabie, choć na videa było vidać, što malavała mienavita dziaŭčyna. Adnak u vyniku kałoniju atrymali i jon, i jana.
Na volu chłopiec vyjšaŭ 7 sakavika 2022 hoda i praź niejki čas vyjechaŭ ź Biełarusi.
Tady Rasija akurat była napaŭšy na Ukrainu, i Klukač, zusim małady, paličyŭ svaim abaviazkam pajści na front dobraachvotnikam. Padčas słužby byŭ źviazany i z Pałkom Kalinoŭskaha, i z pałkom «Pahonia», jaki ŭ 2022 hodzie sprabavaŭ stvarać va Ukrainie Vadzim Prakopjeŭ.
Praz prablemy ŭ adnosinach z sasłužyŭcami i kamandzirami Cichan sychodziŭ z vojska, a paśla viartaŭsia.
Kamientary