Sieviaryniec raskazaŭ, jak uletku 2020 hoda na Akreścina supracoŭniki izalatara pieradavali jamu sała i vadu

«Naprykancy lipienia 2020 hoda ŭ izalatary časovaha ŭtrymańnia na Akreścina pačali adbyvacca nievierahodnyja rečy.

U susiedni sa mnoj karcar pieryjadyčna, na niekalki sutak, traplali palityčnyja, zatrymanyja na akcyjach pratestu. Pačaŭ razmaŭlać ź imi praź vientylacyju i trubu ŭmyvalnika (biez vady suchaja, huk vydatny) — i daviedaŭsia, što na voli bjucca z AMAPam, što ŭ haradach Biełarusi tysiačy ludziej vychodziać na vulicy, a na płoščy Banhałor prajšoŭ 60‑tysiačny mitynh u padtrymku Cichanoŭskaj, dzie vystupała maja Vola.

Dyk voś, roznyja supracoŭniki izalatara padčas abiedu moŭčki pačali pieradavać mnie ŭ šlomkach ad susieda kavałki sała i cukierki, zahornutyja ŭ śviežuju staronku «Biełaruskaj haziety» z adpaviednymi navinami. Treba skazać, ryzykavali hałavoj.

Dobraja źmiena, jakaja ciškom soŭhała mnie ŭ karmušku vadu ŭ paŭlitrovych płastykavych butelkach, padčas adnoj ź viečarovych pravierak hetak ža moŭčki zaciahnuła ŭ kamieru poŭny piacilitrovik. Praŭda, paraskašavać ja nie paśpieŭ — nastupnaja, ranišniaja pravierka z łajankaj vadu vyniesła.

— Kto pieriedał? Kto razriešił?!

Nu, dumaju, nakryłasia maja dobraja źmiena. Pazvalniajuć. Až nie. Prychodziać nazaŭtra, padmirhvajuć. Značyć, i tyja, chto łajaŭsia, načalstvu nia zdali. Albo načalstva machnuła rukoj — maŭlaŭ, nie da taho.

Na piaćdziasiat šosty dzień paśla zatrymańnia (!) mianie narešcie vyvieli ŭ duš. Pryčym zrabiŭ heta hramadzianin načalnik izalatara asabista, u supravadžeńni ŭsiaho adnaho kanvojnaha.

— Možiet, stanok dať, pobriejetieś? (a ŭ mianie amal dvuchmiesiacovaja barada).

Aha. Kali raptam što, chočuć zrabić vyhlad, što trymali tut u dobrych umovach. Nu, dumaju, zabiehali, tavaryšy. Nia viedajuć, jak abierniecca. Pačynajuć chistacca. Jašče trochi ciskanuć — i pasyplucca pałkoŭniki z hienierałami. 

Halicca admoviŭsia. Vyrašyŭ, vyjdu, jak Fidel Kastra.

— Kak chotitie, — lubiezna pacisnuŭ plačyma načalnik. — Vam tak tožie idiot.

(Ujavicie sabie taki dyjałoh siońnia na Kaladzičach ci ŭ Škłovie, siabry palityčnyja. Što?! Nia budzieš halicca?! Hałavu b adarvali razam z toj baradoj.)

Narešcie, padčas adnaho z «sudoŭ» (a mianie praciahvali raz za razam adpraŭlać na «sutki») adzin z kanvojnych šeptam pieraściaroh, što kryminalniki ŭ kamierach z vadoj, da jakich mianie pieravodziać raz na tydzień, stučać na administracyju.

Słovam, na pačatak žniŭnia znutry sistemy byli ŭsie prykmiety kłasičnaha chistańnia siłavikoŭ pierad vyrašalnymi padziejami. Jak napisana ŭ Biblii — «i biesy vierujuć, i trymciać».

Adzinaje miesca sistemy, jakoje trymałasia nieparušna — heta akazalisia stukačy. Jany pa-raniejšamu spraŭna «prabivali» i «raskručvali», pravakavali dy dakładvali, chacia i ŭjaŭlali, što adbyvajecca na voli. 

Nivodnaha «prakołu» ani ŭ lipieni, ani navat u žniŭni siarod stukačoŭ ja nie zaŭvažyŭ. Jašče tady zhadaŭ Sałžanicyna, jaki hetuju parodu daskanała viedaŭ i apisvaŭ. Kali siłaviki ŭ vyrašalny momant mahli pierajści na bok naroda i spadziavacca na amnistyju — stukačy viedali, što im litaści nia budzie.

U 2020‑ym sistema šmat u čym utrymałasia na opieradździełach i sietkach stukačoŭ. Kožny siłavik viedaŭ: zrobić pa praŭdzie — zdaduć i źjaduć stukač dy opier.

Padrabiazna pra stukačoŭ, ź jakimi apynuŭsia ŭ kamiery ŭ pačatku žniŭnia 2020 hoda — nastupnym razam», — napisaŭ Pavieł Sieviaryniec.

• 3
• 0
• 0
• 0
• 0
• 1
• 1
• 0