Biełaruska budavała ŭ Rasii kvateru, ale farmalna aformiła ipateku na stryječnuju siastru. I zastałasia la raźbitaha karyta
Siastra-rasijanka — haspadynia na papiery — pradała kvateru, a davierlivuju biełarusku z małym dziciom vystaviła na maroz.
Biełaruska A. Marozava (Paško) 11 hadoŭ tamu pa zaprašeńni stryječnaj siastry Kaciaryny Dudkinaj pierajechała ŭ rasijskaje Ivanava. Tam jana ŭładkavałasia majstram manikiuru ŭ sałonie pryhažości, jaki naležaŭ siastry.
U Marozavaj zastavałasia biełaruskaje hramadzianstva, tamu jana nie mahła aformić ipateku na siabie. I damoviłasia ź siastroj — chaj ipateka budzie na jaje, rasijanku, a płacić budzie biełaruska. A jak całkam zapłacić kredyt, to atrymaje kvateru ŭ svaju ŭłasnaść.
Dudkina pahadziłasia. U vyniku Marozava z 2018 pa 2023 hod pieraličyła siastry kala $20 tysiač u košt kredytu. Taksama jana rehularna płaciła za kamunałku i zrabiła ramont koštam, jak jana śćviardžaje, bolš za $9 tysiač.
Prablemy pačalisia, kali biełaruska atrymała rasijski pašpart. Siastra pad roznymi padstavami zaciahvała pieraafarmleńnie kvatery, a ŭ kancy 2023 hoda zajaviła, što kredyt całkam pahašany, i zapatrabavała vyzvalić žyllo. Marozava admoviłasia i spačatku pasprabavała asprečyć u sudzie sam kredytny dahavor, ale prajhrała: sud pastanaviŭ, što damovy z bankami byli zaklučany mienavita Dudkinaj i jaje mužam, a nie ŭ intaresach Marozavaj.
Paśla hetaha Dudkina pradała kvateru svajoj maci, A. Siadleckaj, za prykładna za $72 tysiačy. A taja źviarnułasia ŭ sud z pazovam ab vysialeńni biełaruski i jaje małoj dački. U svaju čarhu Marozava patrabavała pryznać hety prodaž kvatery fiktyŭnaj ździełkaj.
Śviedki ŭ sudzie paćvierdzili, što pamiž siostrami była damoŭlenaść, što farmalna ipateku aformiać na Dudkinu, a płacić budzie Marozava, i što mienavita Marozava rabiła ramont u kvatery. Adnak sud paličyŭ heta niedastatkovym: pry kupli-prodažu nieruchomaści patrebnaja piśmovaja forma damovy, vusnyja damoŭlenaści i fakt uniasieńnia płaciažoŭ treciaj asobaj sami pa sabie nie stvarajuć prava ŭłasnaści.
U vyniku biełarusku vysielili. Kvatera zastałasia va ŭłasnaści maci Dudkinaj.
Kamientary